ENRIQUETA GONZÁLEZ RUBÍN

UNA NOTA SOBRE ENRIQUETA GONZÁLEZ RUBÍN

  

     Nun-y gustaba a Julio Somoza’l llibru compiláu por Protasio González Solís en 1890, Memorias asturianas, nel que quedaben recoyíos artículos, poemes, narraciones y dellos textos más publicaos pel sieglu XIX nel Faro Asturiano y n’otros periódicos de la época. Escribió nel so Registro asturiano:

“Forma una pirámide de papel, y es un mamotreto aparatoso, constituyendo una espantable compilación de artículos soñolientos, pesados, farragosos, y de relleno, publicados en El Faro Asturiano y otros diarios ovetenses, en el período de 1854 á 1868, y que tenían por máxima suprema, servir á todo trance al público, una ración cumplida de galeradas, hasta dejarle ahito”[1].

     Ye verdá que’l llibru Memorias asturianas[2] resulta avalumáu: cásique mil páxines en foliu de lletra apretao. Cuando Julio Somoza se quexaba d’esta edición, enantes de 1926, l’accesu a la prensa asturiana del sieglu XIX había ser tovía posible, pero de magar 1934, cuando a resultes de la Revolución d’Ochobre quema la Universidá d’Uviéu y con ella la so biblioteca, que funcionaba como hemeroteca asturiana, la riqueza y variedá de la prensa asturiana decimonónica pasó al territoriu de lo mítico: acceder materialmente a exemplares de la época ye una xera difícil, cuando non imposible. Un llibru como’l de Protasio González Solís rescató pa nós una parte a lo menos de lo que publicaba aquella prensa. Ente más coses, una amuesa esencial de la obra d’Enriqueta González Rubín.

Falsu retratu d'Enriqueta González Rubín
que circula per internet

     Esta muyer de Ribesella aprucía pa nós hasta hai mui poco como la más tapecida d’ente los escritores asturianos. Nin conocíemos la so biografía nin teníemos más obra que la que nos apurría González Solís[3]. Nos estudios que dedicamos a la lliteratura asturiana intentamos llamar l’atención sobre ella, ocupándonos en 1989 de reivindicala como narradora[4]. Tamién avanzamos daqué nel conocimientu de les llendes nes que se movió la so vida cuando precisamos per primer vez la so fecha de nacencia, que tuviera llugar el 17 d’abril de 1832 en Santianes de l’Agua, o el datu de que fuera madre soltera con ventidós años[5]. Más tarde completó la so peripecia vital Juan José Pérez Valle[6], polo que pudimos saber que morriera, con cuarenta y cinco años y seis fíos vivos, el 9 de payares de 1877.

     Sicasí, siguíamos ensin ser a desvelar otres zones escures. Por exemplu, na biografía d’esta autora, Constantino Suárez dexaba apuntao[7] que publicara en 1875 el volume Viaxe del Tio [sic] Pacho el Sordo [sic] a Uviedo, una obra que naide más citaba, nin Fermín Canella, nin Fuertes Acevedo, nin Julio Somoza..., de la que nun se daba cuenta de niún exemplar en ninguna biblioteca asturiana o de fuera. Na so busca atopamos una curiosa edición, Junto al Sella, publicada en Cuba en 1929[8], que se limitaba a recoyer la obra de González Rubín publicada por Protasio González Solís. Nin un datu más, nin una referencia al Viaxe o a manuscritos: de dalguna manera, una y bones muerre González Rubín o el so vilbu, Juan Echevarría, que lo fai en 1881, quedara rotu’l filu familiar y los descendientes d’esta autora que sienten dalgún interés pola so obra nun tienen accesu a otros textos que los conocíos por mor de les Memorias asturianas. Los intentos a lo llargo del sieglu xx de Gonzalo de Palacio, nietu d’Enriqueta González Rubín, de localizar otros escritos de la güela o dalgún exemplar del Viaxe resultaron infructuosos, según testimoniu de la so vilba Mercedes C. de Palacio[9]. Pero hacia 1912 Alfonso Camín publicara na ciudá de Cienfuegos, Cuba, a lo menos un fragmentu del Viaxe, dientro de la so revista Tierra Asturiana[10].

Casa natal d'Enriqueta González Rubín

     Nel añu 2007 aparez en Llanes, por fin, un exemplar del Viaxe del Tiu Pacho el Sordu a Uviedo[11]. Failo como correspuende al arniu de misteriu qu’arrodió siempre esti llibru: l’investigador llaniscu José Antonio Anca tópalu na biblioteca que fuera propiedá de la familia Sánchez Ezquerra, del Palaciu del Cuetu de Llanes, dientro d’un tomu d’historia editáu en 1875. El llibru asturianu ye una edición cenciella, en cuartu, de venticuatro páxines, impresa en 1875 por Eduardo Uría nos talleres que tenía na casa númberu 3 de la cuesta la Noceda, n’Uviéu. El nome de l’autora nun figura na portada del exemplar que nos llega, sinón al final del textu, que ta dividíu nun prólogu (“A los asturianos de aquí y de l’otra banda del mar”) y tres nueches que se correspuenden con tres etapes de la narración del viaxe a Uviéu del tíu Pacho. Esta obra ta escrita en clave d’humor, a la manera de la Relación de un aldeano...[12], enfrentando al home de pueblu a los vezos y curiosidaes de la ciudá. Pero nun ye ensin más un humor inocente, sinón mui a menudo crítico o, como diz Patricio de la Escosura na noticia que da del llibru (y que reproducimos más abaxo), “cáusticu”. Ente broma y broma, son munchos los pasaxes qu’apunten claves polítiques y sociales que nos cuesta entender dende la perspectiva actual. D’un llau, resulta suxerente qu’esti llibru s’edite na imprenta d’Eduardo Uría Rea, periodista afectu a la política republicana[13], y per otru llau que l’añu d’edición seya’l de 1875. Nesi momentu, fracasada la I República pol golpe d’Estáu del Xeneral Pavía del añu anterior, regresa a España Alfonso XII, empieza a redactase’l proyectu de Constitución que s’aprobaría en 1876 y sigue tovía la guerra carlista. A dalgunos d’estos episodios pue que se refiera Enriqueta González Rubín cuando fala de los “faciosos” o de les “costituciones”; esi aparente carácter políticu podía ser una de les razones probables qu’axudaría a esplicar el raru ocultamientu d’esti llibru que, hasta la referencia bibliográfica de Constantino Suárez, naide parez que lu cite n’Asturies.

     Quien sí da noticia de la publicación ye l’escritor nacíu n’Uviéu Patricio de la Escosura, que mantenía nel periódicu El Imparcial de Madrid una sección titulada “Bibliografía”, onde publica baxo l’epígrafe “Acuse de recibo a una dama” la siguiente nota:

Patricio de la Escosura

“Agradezco aquí rendidamente á  la señora Enriqueta G. de Rubín, á quien personalmente no tengo la honra de conocer, el favor que me ha dispensado enviándome desde Asturias un ejemplar del curioso y entretenido folleto, que muy bien escrito en el dialecto Bable (asturiano), acaba de publicar en Oviedo con el título de Viaxe del Tiu Pacho el sordo a Uviedo.

Oriundo de la capital del Principado de Asturias, donde nació mi padre y están enterrados mis abuelos; diputado á Cortes alguna vez por aquella provincia y teniendo todavía en ella parientes muy cercanos, naturalmente cuanto de allí procede, no puede menos de interesarme, y tiene derecho á mi atención privilegiadamente.

Esté, pues, segura la ingeniosa autora de Viaxe del Tiu Pacho de que no tardaré en dar cuenta a los lectores del Imparcial de su discreta y á veces cáustica producción literaria: pero mientras el momento de hacerlo así llega, he creido de mi deber acusarle recibo del folleto, y ofrecerle este testimonio de mi agredecimiento y consideración respetuosa”[14].

     Pal añu 2009 ta previsto dedicar la XXX Selmana de les Lletres Asturianes a Enriqueta González Rubín. Amás d’otros llibros, como una edición facsimilar del Viaxe, los llectores asturianos vamos tener la posibilidá d’acceder a tola obra localizada d’esta autora, editada baxo’l curiáu de Taresa Fernández Lorences[15]. A los textos conocíos y recoyíos en Memorias asturianas, y al recientemente aparecíu y yá citáu Viaxe del tiu Pacho, xúntase agora un poema en castellanu inéditu y manuscritu, “A Lala. Cuento de miedo, dedicado a Fermín Canella que debe ser miedoso”, guardáu ente los papeles de Fermín Canella que conserva la familia Tolivar Alas[16].

Portada interior

     Va ser una bona manera de rindir tributu a esta escritora del sieglu xix, muyer d’amplia formación, periodista, narradora, poeta, qu’escribía con igual procuru n’asturianu qu’en castellanu y qu’inaugura pa la so llingua llariega’l xéneru novelísticu. Abonda con enumerar estes xeres públiques nuna época na qu’a la muyer (y tovía más a la que vive nun pequeñu pueblu del oriente d’Asturies) se-y asignaba namás dalgún protagonismu nel ámbitu de lo privao, pa decatase de que la so vocación lliteraria y dalgunos episodios de la so vida seguro que dieron muncho que falar. Enriqueta González Rubín, y esta pue ser la segunda razón pa que’l Viaxe desapareciera, nun respondía al modelu domésticu que la sociedá de la época proponía pa la muyer (nun parez que fuera obediente nin sumisa), pero sí participa de los rasgos que caractericen la vida d’otres muyeres “lliterates” del so tiempu: pertenez a una familia pudiente, recibe dalgún tipu d’educación que-y permite tar al tantu de les novedaes lliteraries, axuda colos sos ingresos a una maltrecha economía familiar, tien amores desgraciaos y un matrimoniu que, según testimonios contemporanios, nun-y dio la felicidá. Aprovecha la creciente industria periodística del sieglu xix pa difundir los sos escritos. De la obra que-y conocemos hasta agora podemos concluir que nun parez que punxera en cuestión de manera radical el modelu de normes sociales y culturales qu’impedía a la muyer desendolcar una actividá profesional o intelectual, pero yá reflexiona sobre los dos grandes temes del feminismu decimonónicu: la educación de les muyeres (insiste na necesidá de que la muyer reciba instrucción, na idea de qu’ello-y pue permitir educar meyor a los fíos y nun ser un obxetu decorativu al llau del home), y la “sororidá” o solidaridá ente muyeres: llevanta la so voz siempre que dalgún periodista desamerita’l llabor o los conocimientos de la muyer humilde, consciente de que’l trabayu femeninu se desendolca sobre too en casa, ensin que naide lu valore. Escribía en 1865:

“Es más fácil ser célebre escritora, que tierna esposa; buena madre, hija respetuosa y cariñosa hermana. Las coronas de laurel que alfombran el camino de la primera, la compensan de sus fatigas; pero la mujer fuerte de la Escritura vive y muere desconocida, y sólo Dios ciñe á su generosa frente la aureola de la gloria”[17].

Ribesella, a finales del sieglu XIX

     En definitiva, cuando nos referimos a Enriqueta González Rubín tamos falando d’una de les escritores del so tiempu que se mueve, n’asturianu y en castellanu, na vanguardia de la conquista del espaciu públicu pa la muyer. Una pionera que nun tuvo siguidores n’Asturies: nin creó escuela como brillante narradora asturiana, nin toi en que la creara tampoco na defensa de los derechos de la muyer. Resultaba, como muyer, como progresista, como escritora n’asturianu, más cómodo echala n’olvidu qu’intentar entendela o explicala.

[Artículu publicáu na Revista de Filoloxía Asturiana, volume 6/7/8 - Años 2006/2007/2008, Uviéu, Alvízoras/Trabe. Páxs. 487-493]

---

[1] Julio Somoza, Registro asturiano de obras, libros, folletos, hojas, mapas, y ediciones varias, exclusivamente referentes al Principado, que no se hallan en bibliografías anteriores, Oviedo (Centro de Estudios Asturianos), 1926, páx. 197.

[2] Protasio González-Solís y Cabal (rec.), Memorias asturianas, Madrid (Imprenta de Diego Pacheco Latorre), 1890.

[3] Las citadas Memorias asturianas son la fonte de la que nacen toles publicaciones qu’editen a lo llargo del sieglu xx obra d’esta autora, ente elles Enriqueta González Rubín, Collaboraciones periodístiques, Uviéu (Academia de la Llingua Asturiana), 1992, que recueye “Una boda por amor” y “Un indianu como hay pocos”, los dos relatos n’asturianu que conocíemos.

[4] Antón García, “Esa narrativa que nos vien”, Orbayando, 2, Xixón, marzu-abril 1989, páxs. 23-26.

[5] El cuentu asturianu (1860-1939). Edición d’Antón García, Uviéu (Trabe), 1992, páx. 28.

[6] Juan José Pérez Valle, “Una riosellana olvidada: Enriqueta González Rubín”. La Plaza Nueva, 22, Ribadesella (Asociación Cultural Amigos de Ribadesella), noviembre 2006, páxs. 63-67.

[7] Constantino Suárez, Escritores y artistas asturianos. Índice bio-bibliográfico. Edición, adiciones y prólogo de José María Martínez Cachero. Tomo IV, G-K, Oviedo (IDEA), 1955, páx. 379.

[8] Enriqueta González del [sic] Rubín, Junto al Sella. Prólogo de Ricardo A. Casado, Habana (La Casa Fouce), 1929. La edición, según se diz nel prólogu, constaba de cien exemplares y féxola Rogelio Echevarría, fíu de l’autora. Pudimos consultar el negativu que se guarda na “Cuban Heritage Collection” de la Universidá de Miami (EE XX), ente los papeles de Gonzalo de Palacio, nietu periodista d’Enriqueta González Rubín.

[9] Corréu electrónicu del 28 de payares de 2007 con Esperanza Bravo de Varona, directora de la “Cuban Heritage Collection” de la Universidad de Miami.

[10] Tenemos un recorte, páxines 11 y 12, d’un exemplar non identificáu d’esta revista que reproduz l’empiezu de la narración; desconocemos si llegó a publicase entera. Tierra Asturiana nun figura ente la relación de revistes asturianes que circulen nos repertorios hemerográficos. L’únicu datu dalgo concretu que topamos ta sacáu de Jorge Domingo Cuadriello, Los españoles en las letras cubanas durante el siglo xx. Diccionario biobibliográfico, Sevilla (Renacimiento), 2002, páx. 255, onde diz: “Tierra Asturiana. (Cienfuegos) Revista surgida en octubre de 1912. Dtor-Fundador: Alfonso Camín. Col: Hilarión Cabrisas y publicó poemas del Dtor. Estuvo dirigida a los asturianos de esta localidad y no disfrutó de larga vida”. Pela nuesa parte sabemos que tamién publicó obra de Pachín de Melás y de Ramón Huerta Posada.

[11] Enriqueta González Rubín, Viaxe del Tíu Pacho el Sordu a Uviedo. Oviedo (Imprenta de Eduardo Uría), 1875.

[12] Relación de un aldeano llamado Francisco Fernández por mote de la Candonga (1837). Edición, entamu y notes d’Álvaro Arias Cabal, Uviéu (Academia de la Llingua Asturiana, Cartafueyos de lliteratura escaecida, 12), 1996.

[13] A. García Oliveros, La imprenta en Oviedo (Notas para su historia), Oviedo (IDEA), 1956, páx. 126.

[14] El Imparcial, Madrid, 20 de septiembre de 1875. Agradezo esta nota a Juan Carlos Villaverde Amieva.

[15] Son tres les publicaciones que’l Principáu d’Asturies tien previsto facer por mor de los homenaxes d’esta Selmana de les Lletres Asturianes: Enriqueta González Rubín, Obra completa. Introducción, edición y notes de Taresa Fernández Lorences. Enriqueta González Rubín, Viaxe del tíu Pacho el Sordu a Uviedo. Facsímil de la edición de 1875 con prólogu de Taresa Fernández Lorences. Guadalupe Valdés y M.ª Jesús Villaverde (coords.) Enriqueta González Rubín, el sinciu d’una escritora del xix.

[16] Agradezo la referencia a M.ª Jesús Villaverde Amieva.

[17] Protasio González-Solís y Cabal (rec.), op. cit., páx 470.

PEPÍN DE PRÍA EN ZAPATIYES

     Cuando llegué a la semeya de Pepín de Pría quedé maraviyáu. En 1993, mientres preparaba los materiales qu’ilustraríen el mio llibru Lliteratura asturiana nel tiempu (editáu al añu siguiente), andaba esmolecíu porque llevara fotografíes de los escritores asturianos. Nun yera xera fácil. Si quitamos l’interesante llabor gráficu de la Gran Enciclopedia Asturiana, l’únicu autor que tuvo dalgún precuru por mostrar el rostru de los escritores foi Españolito, la pieza clave de los estudios biográficos n’Asturies. Ye tanta la importancia que tien nel nuesu tiempu la imaxe, que cuando consigues poner cara a un escritor d’époques pasaes parez que tas más cerca d’él, que lu entiendes meyor. Asina s’esplica’l rebumbiu llográu nel mundu enteru que determináu cuadru, que lleva sieglos nes manes de la familia británica Cobbe, s’anuncie como retratu de Shakespeare fechu en vida del inmortal escritor. Como si poder observar per un momentu’l so verdaderu rostru (un poco belisgu na mirada, hai que dicilo) nos permitiera tamién asomanos al so espíritu creativu.

Shakespeare, na colección Cobbe

     Como la lliteratura que se fexo n’asturianu a lo llargo del tiempu namás interesó a eses manes inexpertes de les que falaba Caveda en 1839, la iconografía de los escritores asturianos que se podía conocer a primeros de los años noventa del pasáu sieglu XX yera más bien escasa, repetida y nada cuestionada. ¿D’ónde salió la imaxe d’Antón de Marirreguera, con “rasgos característicos del sieglu XIX”, que publica la Enciclopedia Asturiana? Del Archivo Gráfico Universal, quier dicise, del taller románticu y creativu de Jesús Evaristo Casariego, bien andáu’l sieglu XX. Bienllegáu seya esi retratu de bigotes dalinianos, periya mosquetera, grandes güeyos, melena y bonete qu’inventó Casariego. La gorguera, un toque d’época (quién vería al arcipreste, vistíu con esa traza de figurín, dir a dicir misa de madreñes a Llargozana), emparenta al nuesu escritor fundacional con Cervantes, que tamién lleva gorguera cuando lu pinten.

Antón de Marirreguera,
según Casariego

     ¿Cómo ye posible que de Xuan María Acebal namás se disponga d’un grabáu? De tan repetíu, llega un momentu en que parecen distintos los que conocemos, pero ye siempre’l mesmu. Toi seguru de qu’en dalgún arquivu familiar reposa un preciosu álbum enllenu de semeyes del Príncipe de los Poetes asturianos, que tan aficionáu yera a los adelantos que trayía’l sieglu XIX que-y tocó vivir. ¿Cómo diba  resistise a la novedá del daguerrotipu o del retratu d’estudiu? Un álbum con fotografíes de la familia, cola muyer, la fía, el xenru y los nietos; pero tamién d’esa otra familia, tan iconográfica coles sos boines grandes y el so espíritu de guerra, que yeren los carlistes.

Xuan María Acebal

     Na Biblioteca Asturiana que xuntara a lo llargo de la so vida’l Padre Patac, y que naquellos años nos que yo buscaba imáxenes había poco que llegara a la Biblioteca Xovellanos de Xixón, había una carpeta con fotografíes d’escritores. Como en too lo qu’atropaba Patac de las Traviesas, abundaben les copies y les fotocopies, pero yo nun buscaba valiosos orixinales sinón imáxenes que m’axudaren a ilustrar el mio llibru. Y ellí taba la copia d’una semeya na que se vía a Pepín de Pría sentáu nuna güerta posando como que lleía un llibru. Nun había nenguna indicación de procedencia, víase que yera una reproducción d’una foto publicada en dalguna revista pelos años venti, pero yera magnífica, casera, entrañable. Y desconocida. Decidí que con ella tenía qu’abrise’l mio llibru.

Pepín de Pría en zapatiyes.
La semeya publicóse na revista Norte
que dirixía Alfonso Camín.

     Seguramente ye una foto tomada na segunda mitá de los años venti, cuando Pepín de Pría, sintiendo que les pudencies-y fallen definitivamente, decide volver a la so casa llanisca. A lo llargo de la vida foi una constante: cuando les coses-y diben mal xuntaba los restos de la so numberosa familia y marchaba pa Pría, como si la tierra-y diera fuerces pa siguir p’alantre. Y les coses díben-y mal mui a menudu. Pepín de Pría yera una alma soñadora y dalgo bohemia, non un home de negocios. Tamién me parez que la semeya se publicaría en dalguna de les revistes americanes, que naquellos años alimentaben la señaldá de los emigrantes asturianos con ilustraciones de paisaxes y persones de la tierra. Nel retratu vese al poeta sentáu nuna siella modesta, en mediu d’un corral que zarra unos metros per detrás d’elli una muria alta de piedra, que na parte derecha de la foto parez dalgo derrotada. Per esa zona, más atrás, hai un edificiu que seguramente ye una capiella, que podía axudar a identificar el llugar.

     Per detrás del poeta, a esquierda y a derecha, hai pites roxes anduliando llibres pela corralada, que dan al retratu un aire bucólicu. Sicasí, Pepín de Pría nun tien pinta de paisanu, de persona que se tea ocupando de los llabores de la tierra. Parez un señor. Cola mano derecha tien d’un llibru a l’altura del pechu, mientres echa un poco p’atrás la cabeza, como en busca de la distancia que necesita pa enfocar les lletres quien yá tien la vista cansao. Que ye una pose pa la foto, amás del entornu y la postura, indíquenlo los cuatro deos que tienen del llibru per detrás, espurríos, nuna postura difícil de caltener muncho tiempu. Na mano esquierda, zarrada con naturalidá y dél estilu, ente’l deu furabollos y el medianu garra un pitu. Ta impecablemente vistíu: camisa blanca de colletes coles puntes arredondiaes, corbata escura, chilecu claru igual de puntu, chaqueta de cruzar abotonada. El pantalón ye claru y tien los baxos doblaos; ta un poco arrugáu. Parez gastar unos calcetos gordos y claros, como de llana. Seguramente ye un día fríu, d’hibiernu, porque los árboles que se ven per detrás nun tienen una fueya. Pepín de Pría lleva un llargu abrigu perriba los costazos, igual un tabardu, sobre’l que se sienta pela derecha, mientres que pela esquierda-y cai elegante, como enmarcando’l personaxe. Ta tocáu con un sombreru tipu Borsalino, que-y tapa la pronunciada calva que tenía.

     Xosé García Peláez, Pepín de Pría, vese flaque nesta fotografía. Tien los pómulos mui marcaos, y como ta mirando p’abaxo nun se nota que tien los güeyos dalgo prendidinos. ¿Yera roxu? Na copia que vemos nun se pue estremar qué llibru tien na mano. Pol tamañu podía ser guapamente Nel y Flor, el so “cuentu idílicu en bable” de 1926, que s’imprimera sobre papel pluma nos talleres del Oriente de Asturias. Pa cuando aparez esti llibru, editáu por suscripción popular depués de que la prensa reclame un homenaxe al poeta, tol mundu s’alcuerda de Pepín de Pría, de que vive probe y malu en Nueva. A esa corriente de simpatía xeneral que se produz na prensa pue responder esta fotografía. Los periódicos compiten por da-y dende les sos páxines la reconocencia qu’enantes naide-y ufiertara. Dalgunes fuerces vives de la cultura mírense de llau a ver quién y cómo organiza meyor un festival homenaxe al poeta, y critiquen discretamente en público los pasos que dan los demás, y despiadadamente en privao. Al marxe de too ello, encantáu de que dalguién s’alcuerde d’elli, Pepín de Pría entaina pa terminar el so segundu llibru, La Fonte del Cay.

La Fonte del Cay, en Ribesella

     N’avientu de 1928, cuando muerre, tien cerca la guitarra que lu acompañó bona parte de la vida. Porque Pepín de Pría foi ganando col pasu del tiempu merecida fama de poeta, pero él siempre se sintió más músicu que nenguna otra cosa. Prestába-y entonar cualquier melodía, componía cantares de son allegre y lletres tienres punteando una guitarra vieya que lu volvía a la mocedá, cuando les obligaciones familiares (doce fíos) nun lu agobiaben, cuando tenía salú y facía vida bohemia como viaxante de comerciu, componiendo un mapa mental de l’allegría y la música d’Asturies. Cuando s’enteró de que Pepín de Pría morriera, Fernán-Coronas escribió-y un poema echando en cara a los asturianos el so desinterés: “Chora, Sturias, pul bon cantore muertu/ que cantando crucióu el tou desiertu:/ Chora pul tou finísimu cantore/ que moríu de desdeixu ya dolore”.

     Una y bones muertu, empezó una pelegrinación a la casa na que pasara los últimos años. De cualesquier sitiu d’Asturies llegaben los “amantes de les coses asturianes” a llamentase del olvidu inxustu en que cayera’l poeta de Pría, prometiendo a la familia rescatar pal mundu los trabayos imperecederos del xeniu asturianu. Pasín a pasu diben marchando con unes fueyes güei, mañana con unes partitures, pasáu con una llibreta, otru día con fotos, hasta que’l legáu de Pepín de Pría queda esperdigáu per milenta manes, imposible yá de siguí-y la pista, y ensin que cásique naide tenga la decencia de publicar esos materiales. Hasta los güesos de Pepín de Pría terminen nuna fosa común cuando caduca la sepultura na que lu enterraron y, esparcida pel mundu la familia, naide se fai cargu d’ellos.

Otra semeya de
Pepín de Pría

     Vuelvo a mirar la fotografía que guardaba’l Padre Patac nel so arquivu. Nella tovía hai vida, la de Pepín de Pría, l’home tranquilu. Dende la nuesa perspectiva lo que más llama l’atención nel retratu son les zapatiyes, que parecen desentonar del curiáu vestuariu que gasta’l poeta y que-y dan a la semeya un aire familiar, como d’andar per casa. Ye un prexuiciu nuesu, d’esti tiempu. Lo más probable ye que detrás del fotógrafu, esperando a que’l poeta termine la sesión, tean unes cómodes y curres madreñes, el meyor calzáu pa pasar l’hibiernu si lo habitual ye pisar güertes, praos o caleyes. José María de Cossío afirmaba en 1952, falando d’Antón de Marirreguera y de les sos fábules inspiraes n’Ovidio o Virxilio, que “convierte en madreñes el coturno” de los poetes clásicos llatinos. Cossío de xuru que sabía que’l coturnu yera’l calazáu qu’usaben los actores de la traxedia, mientres que’l zuecu (soccus) yera’l de la comedia. De Pepín de Pría, ún de los nuesos clásicos asturianos, podemos dicir que gastaba madreñes, esos zuecos d’Asturies, como correspuende al clima de la tierra. También podemos añadir qu’ensin baxase d’elles supo alzar la so voz perriba’l coru y facer alta lliteratura. A fin de cuentes el coturnu clásicu tenía l’aspectu d’una madreña abierta, con tacos y too, que s’ataba al pie como una sandalia; igual yera mui ceremoniosu, pero poco aparente pa cuando llueve y fai fríu.

JOAQUÍN FERNÁNDEZ, SABIU ASTURIANISTA

A Joaquín Fernández García la muerte llegó-y enantes de tiempu. A los sos sesenta y ocho años, esti home grande en tolos sentíos de la palabra taba llenu d’idees y de ganes de llevales a la práctica. Nes necrolóxiques que nos esplicaben quién yera aquel uvieín que se sentía ayeranu, feches seguramente dende la impresión de la noticia inesperada, eché de menos les referencies a una actividá que lu ocupó munches hores a lo llargo de munchu tiempu: la d’escritor n’asturianu. Foi esa ocupación la que nos punxo en contactu. A finales de 1992, cuando yo daba los primeros pasos con Ediciones Trabe, acercóse Joaquín hasta mio casa p’apurrime l’orixinal (una llibreta d’anielles manuscrita) del so llibru Coses d’osos, que marcaría la pauta de los siguientes, esa manera d’escribir qu’elli llamó recreación etnográfica: narraciones qu’esplicaben con gran detalle distintos aspectos de la vida del Altu Ayer. Curiosamente, nun m’entregaba aquel llibru pa que lu editara, sinón pa que lu lleera y-y contara lo que me parecía.

     Cuando volvimos venos, pocos díes más tarde, yá diba yo revistíu d’editor, dispuestu a convencelu de la necesidá de publicar cuentos tan guapos. Nun foi difícil. Falamos muncho, daquella, del asturianu y les sos variantes. Joaquín yera coleccionista d’ediciones del Quijote, y per bien d’años quixo que yo editara esta obra n’asturianu. La particularidá de la idea de Joaquín yera que cada capítulu se traduciera a un bable distintu, y tenía acutáu pal mio asturianu de Tinéu’l de la dueña Dolorida. De la mesma edá que’l grupu de persones que punxo en marcha Conceyu Bable, Joaquín entendía l’asturianu más como una realidá del pasáu qu’había que dexar por escrito pa que se tresmitiera, que como una proxección hacia’l futuru. El diccionariu de Neira y Piñeiro, editáu pol IDEA, yera la so fonte d’información fiable, anque s’esfotaba sobremanera na so memoria prodixosa y nes palabres que conocía de casa, de cuando pasó temporaes n’Ayer col güelu.

Joaquín Fernández García
(1945-2012)

     Como editor primerizu, pensaba yo qu’aquellos cuentos sobre osos yeran una contribución lliteraria escelente, pero nun tenía claro a quién podía interesar un llibru sobre estos animales escritu na variante del Altu Ayer. ¡Qué sorpresa, ver cómo s’agotaba en pocos meses la primer edición, y cómo se vendía per toa Asturies, y fuera, aquel llibrín ilustráu por Isaac del Rivero padre! Nos años siguientes fui sacando con Trabe nuevos llibros de Joaquín, tolos que me quixo apurrir, los qu’escribía cola so lletra grande y ordenada siempre que tenía un ratín, nos sitios más inesperaos, col so peculiar pulsu narrativu. Quiciabes el más complexu de los que llegamos a editar foi Siete vides, una novela en cinco llibretes manuscrites que s’encargó de trescribir Ana Recio, una aventura total que saca al protagonista ayeranu (un nenu saludaor) a rodar pel mundu, zarrando’l ciclu de la vida otra vuelta nos montes d’Ayer, yá vieyu.

     Cuesta creer que nun vamos volver topanos, alredor de dalguna llibrería d’Uviéu como nos últimos tiempos, con esti sabiu asturianista, de vida tan apasionante como discreta. Actor de teatru na so mocedá, antifranquista activu, médicu del cuerpu y de l’alma, hematólogu, etnógrafu, narrador, biógrafu del so amigu Jaime Salom, impulsor de les donaciones de sangre... Joaquín dexa inédita una gran producción lliteraria, tanto n’asturianu como en castellanu. Per llargues temporaes trabayó nuna novela n’español que pensaba titular Dies iræ, sobre’l mundu de la política y la medicina n’Asturies, anque hai tiempu contóme que la abandonara pa empezar otra serie a la que se refería como los Cuadernos, de la que nun quixo desvelame’l conteníu. Agora, Joaquín camina yá pa contra los Praos del Cielo, depués de la Llaguna de los Muertos, qu’él mesmu imaxinó nel País de los Gorretinos. Ye verdá que colos sos llibros quedamos un poco menos güérfanos, pero fai falta qu’esos inéditos vean la lluz. ¿Iniciará’l RIDEA una colección de lliteratura n’asturianu publicando la obra d’esti distinguíu miembru del Institutu? Taría bien que, dende una institución belixerante pa col tema, se rindiera homenaxe a quien fexo meyor que naide de ponte ente les postures irreconciliables de bablistes y antibablistes.

YA CON ESO ALÓN

EPITAFIOS

     Cuando Carme supo que na tumba de Groucho Marx (1890-1977), nel Eden Memorial Park de Mission Hills, Los Ánxeles, nun figuraba la frase Excuse me, I can't stand up, foi al so blog personal y de la sección d’epitafios célebres borró la entrada correspondiente, qu’ella traduxera un poco a l’antigua: “Disimule que nun me llevante”. Na sepultura de Groucho nun ta esa frase, que nuna entrevista l’actor propunxera pa la so tumba. Pero nella tampoco nun tán les sos cenices, depués de que les robaren. Cuando les recuperaron punxéronles nun sitiu secretu, y quién sabe baxo qué lleenda les guarden.

     Depués foi al que más-y prestaba d’aquella sección d’epitafios. Yera’l d’otru actor, tamién xudíu, Mel Blanc (1908-1989), conocíu sobre too pola so voz como doblador de dibuxos animaos. Na so tumba del Hollywood Forever Cemetery, en Hollywood, figura la famosísima frase That’s all folks, la mesma que pronunciaba Porky, al que daba voz Mel Blanc, al final de Looney Tunes. Una foto atestiguaba aquello, na que se vía una Carme sorriente dexando una xiga sobre la llábana de Mel Blanc. Sicasí, pa ella, como pa tolos nenos españoles, nun yera la voz de Mel Blanc la que dicía Eso es todo amigos. Nun daba más. Carme traduxera la frase al asturianu con una ayalga que-y prestaría como epitafiu propiu, a ella, que yera de Tinéu: “Ya con eso alón”.