APUNTE SOBRE XUACO FANA

  

Xuaco Fana y Enrique Soto n'el Ricón del Bable de El Auseva (1957-1966)

Fernando Soto Ortega (comp.)

Oviedo, Real Instituto de Estudios Asturianos, 2015

     Pa quien s'acercara a la lliteratura asturiana, Xuaco Fana yera l'autor d'unos versos a la Santina nel llibru editáu polos Amigos del Bable en 1976, «Covadonga n'a poesía bable», que recoyía los poemes premiaos na so «Andecha de la Poesía» de 1975. Na bibliografía sobre la lliteratura asturiana nun volvía aparecer esti nome. Los que lu conocieron personalmente, los vecinos y pocos más, sabíen que tres d'esi alcuñu taba'l ciudadanu Fernando Sánchez Rodríguez, más conocíu como Tito Sánchez o Tito el de la Ercoa, qu'en 1951 ganara un concursu de teatru costumista convocáu pol Institutu d'Estudios Asturianos cola obra «Los tres cariñinos», ambientada nuna aldea a la que llegara la modernización. Hai unos años el grupu Teatru Carbayín volvió a representala con gran éxitu, con una actualización de José Ramón Oliva (empeñáu na renovación del teatru popular) qu'incluyía cantares interpretaos pol Coru Errante. Aquel poema y esta obra de teatru yera tolo que se sabía d'esti autor.

     Agora, una edición del profesor Fernando Soto Ortega recupera la poca obra n'asturianu del padre, Enrique Soto (con dalgún cuentu y dellos testos en versu), y la más estensa de Xuaco Fana, publicaes entrambes nel selmanariu «El Auseva» de Cangues d'Onís ente 1957 y 1966. Descubrimos asina, nos versos y proses (cartes al director) firmaos por Xuaco Fana, un autor que s'inxerta nos xeitos festivos de la lliteratura asturiana. A diferencia d'otros escritores populares, Xuaco Fana / Fernando Sánchez ye un autor atentu a la oralidá del asturianu, pero que demuestra conocer mui bien la so tradición lliteraria; la puesta n'escena de dellos poemes vien de Marirreguera, anque con mayor intención cómica («¡Taponái d'aquel vieyu el gorgoveru / y torgái, pa que calle, a aquela vieya!»); n'otros oise la voz de Cuesta («El casu ye que fai tres díes y picu / de tal forma enroñáu tengo el focicu...») o la de Marcos del Torniello («Antón de Mingo'l Coxilu / yera'l mozu de la Pacha, / fía de Xixo el del Melandru, / consuegru de tía Serafa...»). Pero dacuando ye orixinal, como nes definiciones del so «Diccionario de la aldea» (publicáu nes páxines d'ochobre de 1958): «Cha-cha-cha: xiringüelu cubanu; Rocanroll: lloquerada; Agrónomu: llabrador d'oficina; Entidad bancaria: toñil sin jondu; Pacto: tratu de muncha robla y pocu tratu; Dividendu: restu que queda dempués de aplicai el multiplicando, etc.».

     Eses llectures xueguen a favor d'esti autor: l'asturianu del que se manda ye bien curiosu, dignu de mayor aliendu creativu. Nun son munches les veces nes que se pon seriu (el poema a la Santina, una elexía a un amigu muertu), pero demuestren dalgún oficiu lliterariu. Él mesmu, sicasí, yera consciente del so papel limitáu; según s'indica nel prólogu, cuando-y piden nuna entrevista que se compare con otros poetes incluyíos na antoloxía bable de Pedro G. Arias (1959) respuende, sinceru, que la so sección del «Auseva» «no es poesía, es ripio». Agora bien, nada desameritaría la so obra al par de dalgunos de los incluyíos nella. Echamos de menos, nel prólogu de Fernando Soto a esta edición, dalgún fechu biográficu concretu de los dos autores recopilaos nel llibru. Polos testos que se recuperen sabemos que Xuaco Fana tuvo na División Azul, que foi pregoneru del Descensu del Sella y otres fiestes de la contorna, pero esta edición yera una bona oportunidá pa ofrecer más datos sobre la so vida; pa corroborar, por exemplu, si les feches de nacencia y fallecimientu que tenemos anotaes (1916-1977) son correctes.

[Publicao en «Cultura», suplementu de La Nueva España, el xueves 16 de xunu de 2016] 

VALOR Y VALIR EN DURRUTI

Lluvia d'agostu

Francisco Álvarez

XXXVI Premiu de Novela «Xosefa Xovellanos»

Xixón, Hoja de Lata, 2016

     A mediaos de los años ochenta una periodista francesa llega a Moscú cola intención d'entrevistase con Andrés, un vieyu comunista español, exiliáu al terminar la guerra civil, una de les últimes persones que vio vivu a José Buenaventura Durruti. Libertad Casal trabaya nel "Nouvel Observateur", y tanto'l nome como l'apellíu son nicios de la so historia: fía de militantes anarquistes españoles. El padre muerre n'acción de guerra en 1936. La madre, enfermera, va terminar marchando al exiliu francés, nel que muerre dexando a la pequeña Libertad en bones manes: nes d'Elisabeth Eidenbenz, la suiza qu'axudó a salvar a cientos de nenos refuxaos. Lo que busca Libertad Casal en Moscú, una tarde d'agostu na que llueve a xarraos y da títulu al llibru, ye parte de la so historia personal: la madre, Rosalía Casal, foi la enfermera qu'atendió a Durruti nes últimes hores de la so vida, desque recibió un balazu mortal nel frente de Madrid a meudía del 19 de payares de 1936 y la madrugada del día 20, cuando fallez.

Francisco Álvarez (Foto M. Rojas)

     La primer novela de Francisco Álvarez (Xixón, 1970) podía mui guapamente centrase nesti personaxe femeninu qu'abre y zarra la obra relatando, nunes poques páxines y en primer persona, la so vida d'española ensin España. Pero lo que la convoca, lo que la trai a la novela d'Álvarez, ye la investigación qu'entama sobre la muerte de Durruti, y ensiguida ye esta historia, la del revolucionariu anarquista, la qu'enllena la narración de "Lluvia d'agostu". Casal axuda a contar dalgunos fluecos: la miseria na que va vivir la familia de Durruti en Lleón; sobre Mimi, compañera sentimental, y la fía que tuvieron, Colette... Como Casal, Francisco Álvarez tamién ye periodista, y esi oficiu nótase, pa bien, na construcción de la obra, ocupada en narrar los principales acontecimientos de la vida del líder anarquista: la formación en 1922 del grupu "Los Solidarios", la muerte del arzobispu Soldevila, l'atracu al Banco de España de Xixón en 1923, la marcha a Sudamérica y l'acción revolucionaria ellí, la detención en Burdeos y la presión internacional pa que lu lliberen, la so oposición a la república pola que termina deportáu a África, los primeros díes de la guerra en Cataluña y la columna Durruti...

     Hai munchos aspectos sobresalientes en Lluvia d'agostu, una novela entretenida, bien construída, pela que s'avanza entrando nuna parte esencial de la historia d'España; destaca la documentación histórica de la que se manda y la (re)construcción humana d'unos personaxes que llegaron a nós convertíos en mitos. Ensin dulda, la contextualización de los principales episodios biográficos de Durruti ye ún de los grandes aciertos al permitinos entender meyor el sitiu qu'ocupa esti anarquista na historia del movimientu obreru internacional. Como la novela se construye na so mayor parte atendiendo a los detalles llama l'atención que la parte más velada seya precisamente la que centra bona parte de la trama, la de la muerte del líder anarquista. ¿Accidente, un disparu facista, comunista, anarquista...? Francisco Álvarez, qu'espón toles teoríes, nun toma partíu na novela, quiciabes porque, como nel pactu de silenciu nel que se conxuraron los testigos naquel tiempu, el final abiertu agranda'l mitu. Y que fuera un accidente (esi ye'l testimoniu de Cuyás, el so xofer, de vieyu: enfadáu, Durruti pega col fusil nel estribu del coche y l'arma dispárase) nun parez dignu de quien, más temerariu que valiente, como-y diz el comunista Andrés Tudela a Casal en Moscú, una tarde d'agostu con lluvia, nun yera consciente del so valir.

PLÁCIDU BRILLU A LES INSIGNIES

  

Encuentros con el 50. La voz poética de una generación

Miguel Munárriz (ed.)

Madrid, Ámbito Cultural del Corte Inglés, 2015

     El primer semestre de 1987 resultó ser d'extraordinaria intensidá lliteraria. Empezámoslu, Xuan Bello, Berta Piñán y yo, presentando'l primer númberu d'«Adréi» que publicáramos a piques de rematar 1986. Mientres díbemos preparando'l númberu dos, un importante saltu cualitativu que diba salir en mayu, la organización y dalgunes ponencies de la I Xunta d'Escritores Asturianos ocupaben el nuesu tiempu. Celebróse aquella xunta en Villamayor, na Casona de les Güelgues, ente los díes 27 y 29 de marzu y supunxo, con sonaes polémiques y una fienda ente distintes maneres d'entender la lliteratura, l'arrancada d'una nueva xeneración lliteraria, lo que diba terminar llamándose la Segunda Promoción del Surdimientu. A primeros de mayu'l Día de les Lletres Asturianes nun consiguió apagar los fueos de la polémica Xunta, avivaos entá pola publicación de la revista de l'Academia dedicada a la creación lliteraria (el númberu 24) y que coordinaren con criterios novedosos Berta Piñán y Xuan Bello.

     Ensin parada, a finales de mayu asistíamos nel Teatru Campoamor, ávidos espectadores, a los «Encuentros con el 50», onde se xuntaben a falar de poesía dellos de los principales poetes españoles de la Xeneración del Mediu Sieglu al par de dalgunos de los sos críticos y estudiosos: Carlos Barral, Francisco Brines, José Manuel Caballero Bonald, Jaime Gil de Biedma (que nun tuvo n'Uviéu, anque se proxectó una entrevista con él), Ángel González, José Agustín Goytisolo, Claudio Rodríguez y Carlos Sahagún. Hai quien diz qu'esos alcuentros sirvieron pa convertir a los poetes del grupu en verdaderos clásicos de la lliteratura; quiciabes fuera asina, pero pa munchos de los que tábemos ellí aquellos poetes yeren los nuesos clásicos y la so presencia ente nós tenía dalgo de verbu fechu carne: «Como vieyos guerreros arrodiaos de nietos, / saquen plácidu brillu a les insignies», escribió a cuenta de too aquello Xosé Manuel Valdés nun maraviosu poema tituláu, precisamente, «Xeneración de los Cincuenta».

Miguel Munárriz

     Y too aquello, baxo la dirección de Miguel Munárriz, foron debates y llectures (Alarcos, Martínez Cachero, García de la Concha, García Martín, Duque Amusco, Fanny Rubio), nueches de cantares con Amancio Prada, Luis Eduardo Aute y Paco Ibáñez, exposiciones de fotografía, de documentos y de pintura (Linares, Velasco, Alba, Paredes, Herrero, Sierra, Pandiella, Redruello, Sanjurjo...). La ponencia inaugural daríala, la tarde del primer día, Luis García Montero. La intensidá d'aquelles tres xornaes, les primeres d'una serie que se llamó «Los Encuentros» y llegaron hasta l'añu 2000, quedó recoyida nuna publicación que salió en 1990, «Encuentros con el 50, la voz poética de una generación». A puntu de cumplise trenta años d'aquel alcuentru, Miguel Munárriz recupera pa los nuevos llectores una parte d'aquel llibru. Echamos de menos dalgunes aportaciones que taben na primer edición (la de José Doval, por exemplu). La d'agora queda reducida a lo esencial, que nun ye poco: la trescripción de los alcuentros, les entrevistes a Gil de Biedma y Ángel González y les notes crítiques sobre la obra de Gil de Biedma, Carlos Barral, Carlos Sahagún y María Victoria Atencia. Nun taba naquella edición, pémeque, la ponencia que zarra esti volume sobre los poetes hispano-mexicanos del exiliu (seique la otra Xeneración del Mediu Sieglu) que firma Susana Rivera. Esta reedición, necesaria y oportuna, ábrese con un llargu, documentáu y amenu prólogu de Miguel Munárriz onde da cuenta de cómo foi la difícil y guapa aventura de celebrar a los poetes de los Cincuenta, un homenaxe qu'ainda dura na memoria de los que, ávidos espectadores, nun perdimos convocatoria.

[Publicao en «Cultura», suplementu de La Nueva España, el xueves 2 de xunu de 2016] 

CELEBRACIÓN DE LA CARNE

Cubierta

  

El sol de medianueche

Luis Salas Riaño

Xixón, Impronta, 2016

     Luis Salas Riaño (L'Infiestu, 1960) vive en Noruega dedicáu a la enseñanza. Nos primeros años ochenta compartía pisu d'estudiante n'Uviéu con Carlos González Espina, qu'acabaría siendo'l so editor, y col poeta Miguel Allende. Coincidimos na tertulia lliteraria Oliver cuando los tertulianos, amás de González Espina, yeren Víctor Botas, García Martín, el yá fallecíu bibliotecariu d'A Veiga Félix Menéndez, Eduardo Errasti, Xuan Bello o Felicísimo Blanco, ente otros. Les primeres publicaciones de Salas Riaño, n'español, nacieron dientro de la tertulia y fueron relatos o poemes propios («Fragmentos de metro incierto», 1985) o traducciones, como la colección de sonetos eróticos italianos «El vaso de Pandora» (1986). Ensin que la reivindicación del asturianu-y resultara completamente ayena, foi la expatriación la que lu fexo volver a la llingua familiar pa traducir, primero cuentos populares noruegos (1990) y ensiguida'l «Peer Gynt» d'Ibsen (1991). En 1996 reunió los sos relatos, que van de lo sentimental a lo pornográfico, n'«A teyavana».

     La so obra poética n'asturianu, que va adelantando nel blog que caltién abiertu baxo'l so nome, suma dos títulos, «La llingua encesa» (2004) y el recién salíu volume «Al sol de medianueche» (2016), que nun nun son difíciles de poner en relación: entrambos llibros recueyen sonetos, cásique sesenta y siete nel casu del primeru y los casi ciento cuarenta y siete'l d'agora (dalgún poema nun tien los catorce versos canónicos), más unitariu nel tema: una poesía que podemos llamar concupiscente (erótica, de celebración carnal, llibertina y divertida) inclusive a sabiendes de que ye una etiqueta negativa pa la moral de la igresia; precisamente por eso la usamos. Salas Riaño pasea pelos sos poemes un personaxe masculinu atentu a lo que lu arrodia, que se desenvuelve nesi sol de medianueche que da títulu al conxuntu; esi sol que nos países nórdicos nun s'apaga del too y crea la penumbra que necesiten les pasiones, les más baxes y les más altes. 

Luis Salas

     Estos versos, anque escritos n'asturianu, nun beben na tradición lliteraria secreta d'esta lliteratura (que conocemos poco: les cosadielles de Cuesta y seique de Fabricio, la defensa del peu de Caveda; nada sabemos de les «desvergüences» del romance de la Marica que Xosefa Xovellanos tomó como afrenta que-y lu atribuyeran), sinón la clásica que vien de Catulo y pasa por Verlaine y Apollinaire, dos poetes de los que Salas Riaño tradució «poemes llibres» al español en 1985 y 1986. Pero tamién la que sigue la escondida sienda de la poesía orxiástica española, la que floreció ente los sieglos XVIII y XIX y tentó a Moratín y a Samiego o a Espronceda y Valera, poniendo en relación eros y tánatos. Sicasí, al protagonista de los poemes de Salas Riaño la muerte, menos la pequeña, esmolezlu poco: busca correspondencia nel sexu femeninu y canta esa busca: la mirada que restola y escueye, l'averamientu fallíu cuando pudo ser y nun fue, la celebración de la conquista, la consumación de l'atopada carnal, l'amante solitariu... L'humor, la ironía, la doble intención... son rasgos que definen estos poemes (como «La más turbadora»: «Fuxiste cola música a otra parte / y dexástime solu na estacada, / boca arriba, col techu na mirada, / privando al instrumentu del to arte.»), nos qu'a la poesía se xunten munchu trabayu, inxeniu, placer y diversión: «Y que l'aire al salir de madrugada / la calme, fecha polvu, paya, nada.»

LLITERATURA Y VIDA

Lliteratura, revista lliteraria asturiana

Númberu 32, mayu 2016

Uviéu, Academia de la Llingua Asturiana, 2016

     Dende l'añu 2014 la revista Lliteratura, que dirixe Xosé Bolado, fai coincidir la so salida añal cola celebración de les Lletres Asturianes. Puntual, llegó asina esti númberu 32 nun añu nel que la institución que la edita, l'Academia de la Llingua Asturiana, anunció la creación d'un Premiu Nacional de Lliteratura que se va dar cada tres años y que se convocaría yá pal añu veniente. Bienllegáu seya esti premiu, que siguiremos con interés y atención, del qu'esperamos a lo menos qu'aballe un poco les agües manses, pigarcioses, d'una lliteratura enllena de sacrificios y que recibe poques allegríes.

     Esti númberu 32 vien ordenáu por secciones, zarrándolu una reseña firmada por Marta Mori. En «Narrativa» préstanos destacar los dos cuentos d'Elisabet Felgueroso, que lleva tiempu ensin publicar llibru y que namás tenemos oportunidá de siguir per revistes. El valencianu Josep Carles Laínez, qu'escribe dacuando n'asturianu, publica «Palabres espardíes», les páxines escrites ente 2007 y 2010 nesta llingua en Tabularium, el so diariu. Al suprimir les feches, los testos qu'apurre, anotaciones atemporales, lléense «como si foren prosa, pero en poemes», tal y como pide l'autor. Diego Nieto publica unos fragmentos de conversación, Ánxel Álvarez Llano dos cuentos breves premiaos en sendos concursos y Xuan Porta un relatu.

     La estaya con más colaboraciones ye la de «Poesía», que recupera la voz de dellos poetes que lleven tiempu ensin publicar al par de xente mozo o qu'entama a dar los primeros pasos nesta llingua. Berta Piñán publica siete poemes, José Luis Rendueles nueve. Luis Salas Riaño calienta motores dende Noruega, el país nel que vive dende hai delles décades, al publicar tres sonetos escatolóxicos (del más acá, convién avisar) qu'anticipen el llibru que va sacar ensiguidina. Ana Vega publica un poema en gallego-asturianu. Los tres poemes d'Alfonso López Alfonso son, seique, los primeros que publica nesta llingua. Yá señalamos hai poco a Raquel Fernández Menéndez y a Andrés Astur Treceño como dos voces nueves qu'hai que siguir nel panorama de la poesía n'asturianu.

     Vicente García Oliva abre la sección «Ensayu» con una llarga reflesión sobre la nuesa lliteratura infantil y xuvenil comparándola cola gallega, catalana y vasca, con una llamada d'atención a l'atonía editorial y al baxu nivel creativu de lo que se ta publicando. Señala como causes, ensin dulda acertando, la falta de relevu nos llectores, los competidores mediáticos, la falta de texíu social, la desaparición de llibreríes especializaes, la protección institucional menguante... Too ello podría resumise en cuatro palabres: falta d'industria cultural. La poesía asturiana aguanta la comparación con otres llingües del estáu (a ello se refier Oliva) por ser un xéneru que pue sobrevivir ensin industria, lo que nun pasa colos demás. Xuan Xosé Sánchez Vicente dedica'l so artículu a Caveda como exe esencial de la lliteratura asturiana al establecer el canon de lo que lu precedió y marcar l'estándar llingüísticu que siguimos. Víctor Suárez repasa lo qu'hai de ciencia ficción n'asturianu (anque escaez dalgún cuentu de los años ochenta de Neto, el dibuxante, supongo que difícil de topar). Na sección «Varia» Miguel Allende traduz el poema «La carretilla colorada» de Williams Carlos Williams (del que yá fixera una versión Héctor Fernández), que-y sirve pa contanos la historia d'un vecín, Oscar el de la carretilla, col que fai lliteratura a partir del poema de Williams y de la vida.

[Publicao en «Cultura», suplementu de La Nueva España, el xueves 19 de mayu de 2016]

CUESTIÓN DE TIEMPU

Formientu, 14

Formientu, revista de lliteratura MUI moza

Númberu 14, avientu 2015

Xixón, Xareos!, 2015

     Dende hai dellos númberos, la revista «Formientu» que dirixe Inaciu Galán dedica les últimes páxines a apurrir una amuesa de cómo escribíen los nuesos payuelos enantes de que cumplieren los trenta años, esa barrera temporal que permite tar dientro o fuera d'esta publicación. Pepín de Pría o Pachín de Melás yá salieron nesa estaya, si nun me confundo. Nesta nueva entrega, la númberu 14 d'una revista que camina pa cumplir los diez años, ye Ángel de la Moría (1858-1895) quien asoma a eses páxines. El testu escoyíu d'esti autor que dalguna vez clasificamos dientro de la Xeneración del Folclore ye un sonetu, «Al Carrocéu». La inclusión d'estos endecasílabos espresivos y sonoros zarrando la revista (con un error grave nel testu: nel versu 12 corrixen el "to" orixinal –del verbu tener = tengo o teo– como "too", indefiníu) complica abondo, no llingüístico y no lliterario, la valoración de la nueva lliteratura "mui moza" que xurde nestes páxines.

     Como siempre, les colaboraciones de la revista «Formientu» son desiguales y, como siempre, los meyores testos fírmenlos unos pocos autores. Por supuestu llama la nuesa atención, por razones extralliteraries, la poesía de Tiégui Alves, un bordelés (de Burdeos, Francia) de 1983 con raigañu na Miranda portuguesa qu'escribe na variedá mirandesa del asturlleonés. Entendemos, lleendo a Alves, les enormes dificultaes qu'ha tener la Tierra de Miranda, un llugar pequeñu que sufre la despoblación de lo rural, pa que la so llingua se siga tresmitiendo. Esa tresmisión cúmplese bien na autora cola qu'abre esti númberu, Irma González-Quevedo (Uviéu, 1987), fía y nieta d'escritores, que publica un poema emocional y narrativu, al que quiciabes-y falte contención y-y sobre adxetivación, una característica que yá vimos n'otres obres suyes y en dalgunos de los poetes que lleemos na revista. Nun hai namás poesía nestes páxines; de los diecinueve colaboradores, siete publiquen prosa. El primeru d'ellos, Xurde Álvarez Antón (Mieres, 1990), entrega un cuentu que parez sacáu de la tradición narrativa asturiana anterior al Surdimientu.

     «Formientu» 14 permite conocer una amuesa significativa de los "Poemes pa nueches de media lluna" de Moisés Cima (Uviéu, 1983), el llibru col que ganó'l Fernán-Coronas del añu pasáu y que ta inéditu. D'ente los autores de los que yá tuviemos oportunidá de lleer más obra, banciando ente'l castellán y l'asturianu, Raquel F. Menéndez (Salas, 1993) ye, xunto con Andrés Astur Treceño (Uviéu, 1992), la voz poética más formada de les que suenen nestes páxines. Nel cuentu de Blanca Fernández Quintana (Bimenes, 1994) alcontramos, nuna evolución estimulante, una narradora con oficiu. Pero hai más autores a los qu'emprestar atención: Francisco Priegue, Olaya Mallada, Alba Carballo y Héctor Menéndez Aneiros tienen en común que nacieron n'Avilés, la ciudá d'Asturies más castellanizada, la más complexa llingüísticamente falando. Dalgunos d'esos apellíos parecen nicios de la condición migratoria de les sos families; que se comprometan col asturianu (nun lo olvidemos: escribir güei nesta llingua nun ye una simple opción natural) permite un relativu optimismu. Na otra parte de la balanza un usu escolar de la llingua fainos sospechar que falta, ente la mayor parte de los autores asturianos más nuevos, la llectura atenta de lo que se vieno escribiendo y traduciendo nestes décades de Surdimientu. Quiciabes seya, únicamente, cuestión de tiempu.

[Publicao en «Cultura», suplementu de La Nueva España, el xueves 12 de mayu de 2016]  

ROMANOS Y ASTURES SOBRE'L TARRÉN

Las Guerras Astur-Cántabras

Jorge Camino Mayor, Eduardo Peralta Labrador y Jesús Francisco Torres Martínez (Coordinadores)

Oviedo, KRK Ediciones, 2015

Cubierta

     Nun llegaron a nós les principales fontes d'información romanes sobre les Guerres Astur-Cántabres, el llibru 135 y siguientes d'«Ab urbe condita» de Tito Livio y l'autobiografía d'Octavio Augusto, asina que los investigadores lleven sieglos conformándose colos resúmenes que fixeron los historiadores Floro y Dión Casio. Tito Livio, cronista oficial d'Augusto, hubo describir tan puntualmente les campañes del primer emperador romanu que los analistes contemporanios d'él malapenes s'ocupen d'estos fechos. De la importancia que los propios romanos dieron a la pacificación del noroeste peninsular lléguennos ecos lliterarios de primer orde: la oda III 14 d'Horacio fala del victoriosu Augustu que vuelve a Roma depués de dir buscar al últimu requexu d'Hispania'l lloréu que namás se gana cola muerte. Quiciabes pola ausencia d'eses fontes, que podemos suponer riques en detalles, y pol hermetismu de los resúmenes que llegaron, los datos escritos sufrieron la interpretación imaxinativa de quien quería rescatar aquellos episodios históricos de la nueche de los tiempos, colocando nel mapa de los intereses localistes los pocos topónimos que nos dieron los romanos.

     Pal profanu en temes históricos, como ye'l mio casu, nun dexa de resultar llamativu enterase de que namás nestes últimes décades l'arqueoloxía empieza a ocupase con dalgún sistema d'estes guerres, a partir de les investigaciones del territoriu qu'hai en Cantabria ente los ríos Pas y Besaya, que continúa na Carisa asturiana y n'otros sitios pel norte de Palencia y Burgos, aportando mui valioses informaciones aillaes que necesitaben una puesta en común. Ello foi lo que se fixo en Xixón, del 2 al 4 d'ochobre de 2014, nel «Primer Encuentro Arqueológico de las Guerras Astur-Cántabras», del que se publiquen nesti llibru les actes, informando de cómo tán nesti momentu estos estudios sobre'l tarrén, too ello acompañao d'abundantes ilustraciones y mapes que permiten localizar con facilidá la ubicación de los campamentos romanos y observar la magnitú del territoriu (60.000 km²) nel que se desarrollaron estos fechos.

     Depués d'unes páxines d'homenaxe a González Echegaray, Casado Soto y Diego Santos, hai nel llibru una sección qu'estudia la figura d'Octavio Augusto nel so momentu históricu, contextualizando tamién los pueblos ástures y cántabros n'Hispania; un artículu de Ramírez Sábada repasa los intentos d'identificación de los topónimos que dan les fontes romanes. El volume ocúpase de les fortificaciones y asentamientos correspondientes a les guerres cántabres (Cantabria, Palencia y Burgos) per un llau, y a les ástures per otru (Asturies, Lleón y Galicia), atestiguando colos nuevos campamentos  que van apareciendo la intensidá de la intervención romana nel noroeste peninsular. Estos estudios arqueolóxicos confirmen l'avance militar de les lexones de sur a norte a través de cuatro víes d'entrada (l'Escudu, la Carisa, la Mesa y a Corredoira), corroborando de pasu la so importancia, señalada por Xulio Viejo yá en 2003, na configuración del mapa dialectolóxicu, y seguramente del sociocultural, de l'Asturies que llega a los nuesos díes. Quiciabes por eso estes actes, onde se recueye malapenes un niciu de lo que puen dar de sí estos estudios arqueolóxicos, falen de fechos históricos d'un tiempu remotu que, ensin que yá séyamos conscientes, conformaron el nuesu presente como nengún otru.

TEXTU, CONTEXTU

Lletres Asturianes, 114

Lletres Asturianes

Númberu 114, marzu 2016

Uviéu, Academia de la Llingua Asturiana, 2016

     A un de los textos más singulares de la lliteratura asturiana, el «Viaxe del Tíu Pacho el sordu a Uviedo», dedica Xuan Xosé Sánchez Vicente'l so artículu nesti nuevu númberu de la revista «Lletres Asturianes», publicada pola Academia de la Llingua Asturiana. Fai nél un análisis pormenorizáu y intelixente de la obra, una novela («novelina» llámala Sánchez Vicente) escrita por Enriqueta González Rubín (1832-1877), impresa n'Uviéu en 1875 y que desapareciera llamativamente, hasta'l puntu de que los repertorios bibliográficos de la tradición (Canella, Fuertes Acevedo, Somoza, Oliveros) nun la citen siquiera. Les úniques referencies parecíen aportar de la otra banda la mar: Constantino Suárez «Españolito» y Alfonso Camín. Sicasí, el llibru apareció cerca casa: en Llanes, un únicu exemplar guardáu dientro d'otru llibru. Sánchez Vicente, como vien faciendo de va tiempu coles obres más representatives d'esta lliteratura, llee la obra con atención, desentellízala y fai por desvelar les partes más escures, como la interpretación d'esi «pote/porte» na que parez acertar de llenu. Deldora de Marirreguera, la obra inxértase dientro de la conocida tradición del paisanu de pueblu que viaxa a la capital y se maravía de les novedaes que ve, pero arriquecida con carga social y crítica política, anque tengo pa min que se nos escapen la mayor parte de les claves qu'escuende la obra. ¿Ye esta la primer novela de la lliteratura asturiana? Canella diz qu'esta mesma autora publicara en 1864 una novela na prensa asturiana, entendemos que por entregues y desconocida pa nós, que nun sería esta. Sabiendo que la primer novela de la Renaixença catalana ye de 1862 y la primera gallega de 1870 (anque publicada en 1880) podemos entender meyor l'aventura extraordinaria de la escritora Enriqueta González Rubín.

     Esti númberu de «Lletres Asturianes», el 114, complétase con dellos artículos valideros: sobre prefixación verbal, sobre l'infinitivu flexionáu, sobre la negación n'asturianu, sobre l'orixe de la palabra guah.e, sobre'l doblaxe al asturianu y sobre les referencies a la Corona d'Asturies nun testu del sieglu XIV de Paolino de Venecia. Pel so llau, Cristina Valdés Rodríguez publica «Un enfoque polisístemicu a la traducción n'asturianu: normes y estratexes», un trabayu programáticu del mayor interés. Nél avérase, dende l'enfoque polisistémicu que tanta atención empresta al contextu, a la traducción como procesu cultural esencial pal desarrollu de les llingües. Los epígrafes que dedica al papel de la traducción na historia y a les teoríes culturales de la traducción permiten entender a Branchadell, a quien se refier Valdés Rodríguez, que prefier falar de «llingües menos traducíes» enantes que de minorizaes. El remate del so artículu, «Estratexes, posibilidaes y conclusiones», quier poner les bases de lo qu'ha ser el trabayu futuru pa que la traducción termine convirtiéndose nun instrumentu de cambiu cultural. Sicasí, cuando analiza la traducción n'asturianu y manexa la bibliografía curtia qu'hai sobre'l tema (d'Andrés, Martino, Cortina, Llano, González Arias, Mori) Cristina Valdés obvia l'aportación temprana y esencial de Xosé Gago, que nin siquiera cita na bibliografía; échase en falta. Esti poeta y traductor (Safo, Homero, Kavafis...) participó na I Xunta d'Escritores Asturianos (1987) con una llarga ponencia que tituló «La traducción n'Asturies: problemes y perspectives» y nella averábase con llucencia a la traducción n'Asturies (la lliteraria y la non lliteraria) como fenómenu cultural y dientro del so contextu, analizando les necesidaes, los peligros y los errores. Sigue teniendo abonda vixencia, llamentablemente.

[Publicao en «Cultura», suplementu de La Nueva España, el xueves 28 d'abril de 2016]

ACTA DE LA VIDA

 

Chicolate espeso

Esther Prieto

Prólogu d'Inaciu Iglesias

Uviéu, Trabe, 2015

     L'aventura editorial del selmanariu Les Noticies, publicáu íntegramente n'asturianu ente 1996 y 2012, contribuyó de manera eficaz a fixar l'estandar asturianu, esa llingua media o neutra que yera la gran esmolición d'una parte del asturianismu lliterariu pelos años ochenta y noventa del sieglu XX como respuesta harmonizadora a les teoríes de los munchos bables. Naquelles páxines escribió bona parte de lo más destacao de les lletres asturianes, dacuando como redactores y otres veces como columnistes: Xuan Bello, Pablo Antón Marín Estrada, Berta Piñán, Sixto Cortina, José Luis Piquero, Martín López Vega, Marta Mori, Vanessa Gutiérrez, Milio Rodríguez Cueto, Henrique Facuriella y un llargu etcétera. Esther Prieto (Arenas de Cabrales, 1960), poeta de referencia con dos llibros publicaos indispensables (Edá de la memoria, 1992, y La mala suerte, 2000), colaboró como articulista en dos etapes distintes, de finales de los noventa a 2002 y nos tres últimos años del periódicu. 

Esther Prieto

     Una selección d'aquellos artículos breves y directos, que caminaben de lo particular a lo xeneral en menos de doscientes palabres, ye lo que recueye agora esta publicación de Trabe, la editorial qu'ella mesma codirixe. La llectura de Chicolate espeso permite, d'un llau, establecer un diálogu cola autora, que vacia nestos testos los sos esmuelgos cotidianos. Asina, equí queden apuntaes les llectures que fai (César Vallejo, Cristina Peri Rossi, Crista Wolf, Daniel Pennac, una reflesión sobre la traducción de Palacio Valdés al asturianu que da sentíu a la novela más conocida d'esti autor...), les noticies que la conmueven, los asuntos políticos que la movilicen, lo que la enfada... Hai sitiu pal asturianismu, esa preocupación recurrente a la que tanto-y cuesta echar una mirada positiva al mundu; queda reflexada tamién la militancia feminista como parte d'AFA, la histórica Asociación Feminista Asturiana; l'autora declárase muyer d'esquierda plenamente consciente del sitiu qu'ocupa en mundu una fía de la emigración económica a la Europa nel desarrollismu de posguerra; asoma la televisión o el cine, descúbrese la llectora de periódicos, la persona atenta a les noticies que marquen el nuesu tiempu.

     Porque, d'otru llau, la llectura d'esti llibru, que recueye los artículos nel orde cronolóxicu nel que se publicaron, permite que refresquemos la memoria y observemos cómo siguimos dando vueltes a los mesmos asuntos que nos ocupaben hai diez o quince años: lo público, la crisis económica, la igualdá ente homes y muyeres, la corrupción, la violencia de xéneru, la reivindicación llingüística, la obstinación de la igresia por regular aspectos más carnales qu'espirituales... Pero si hai un tema recurrente nesti llibru ye'l palestinu. Prieto, vinculada familiarmente con esi pueblu, narró en 2001 la so peripecia na novela Güelu Ismail (premiu Xosefa Xovellanos). Xunida sentimentalmente a la suerte d'esta xente que sufre como naide la xeopolítica del mundu, militante propalestina, va dando amarga cuenta de les novedaes qu'ocurren n'Oriente Mediu: la colonización polos israelís de tierres que nun-yos correspuenden, la intifida, los desplazamientos, Sabra y Chatila, Naplusa... Cachinos d'historia, dacuando a munchos kilómetros d'onde se tomen les decisiones y se sufren les consecuencies, otros que suceden al nuesu llau, de los qu'Esther Prieto va llevantando acta.

AMBICIÓN SUBLIME

 

Punto de ebullición

Antología de la poesía contemporánea en gallego

Selección, traducción y prólogo de Miriam Reyes

Madrid/México, Fondo de Cultura Económica, 2015

     La propuesta que fai Miriam Reyes, poeta gallega qu'escribe n'español, na antoloxía Punto de ebullición qu'edita billingüe'l Fondo de Cultura Económica ye arriesgada, y quiciabes por eso mui interesante: nun tien problema n'escluir nomes «imprescindibles» del periodu del que s'ocupa. Como esplica nel prólogu, punxo la barrera na mitá del sieglu XX, en 1950, dexando fuera poetes que nacieron enantes d'esa fecha y que nun tengan dos llibros publicaos. Un prólogu bien informáu empieza repasando a grandes rasgos l'estáu de la cuestión poética en Galicia: Rexurdimento (Rosalía, Curros, Pondal) nel sieglu XIX, Manuel Antonio na primer mitá del XX, el grupu formáu alredor de Galaxia na posguerra, hasta la renovación de los setenta y l'empiezu de los ochenta: Ferrín, López Casanova, Pexegueiro, y el Cunqueiro d'Herba aquí e acolá, que coincide cola oficialidá del gallegu y el «camino de (re)conocimiento oficial de una joven lengua antigua». 

Miriam Reyes

     Pa contanos lo qu'ocurre na poesía gallega, Reyes déxase guiar polo que llama «focos de calor»: grupos y publicaciones colectives, en primer llugar (Brais Pinto nos años 50, Loia, Rompente, Cravo fondo y Alén nos 70, Letras de Cal nos 90, Redes Escarlata na primer década del sieglu XXI...). El segundu «foco de calor» fixa l'atención na voz de les muyeres, constatando qu'en gallegu «las poetas alcanzaron la visibilidad de la que carecen en otras literarturas» gracies al llabor de muyeres qu'exercen la crítica, y d'una revista fundacional Festa da palabra Silenciada (1983). El tercer focu ocúpase de la poesía fuera del papel: videopesía (Antón Reixa como pioneru), performance, acción y internet. Darréu, l'antóloga fai un repás rápidu y completu de les principales antoloxíes que recueyen poesía gallega dende los años ochenta hasta agora, pa terminar proponiendo tomar la temperatura d'esta poesía a través de la so selección: quince poetes (ocho muyeres y siete homes) nos que me parez ver como puntu de xuntura lo qu'ella mesma dicía a cuenta de la renovación poética que llegaba nos setenta de la mano de Ferrín: «un espacio en el que el compromiso social no implicase renunciar a la experimentación poética y hubiese lugar también para lo íntimo».

     En 1950 naz el mayor, Xosé María Álvarez Cáccamo, el poeta de la memoria; guardamos alcordanza del so pasu per dalguna de les xuntes que punxeron les bases de la lliteratura asturiana, igual que más tarde lo fairíen otros autores incluyíos: Manuel Rivas (1957), María do Cebreiro (1976) o Yolanda Castaño (1977). Aparte d'estos, los de más edá son los que meyor conocemos: Chus Pato (1955) y Pilar Pallarés (1955), Lois Pereiro (1958-1996), de quien el Día das Letras Galegas de 2011 rescató la obra, o Xela Arias (1962-2003). Olga Novo (1975) tamién trespasó les llendes de la so tierra al tar traducida al español. El restu de nomes, anque seyan bien conocíos ente los llectores gallegos, lleguen a min per primer vez, cumpliendo sobradamente esta antoloxía cola so función divulgativa: Antón Lopo (1961), Ana Romaní (1962), Manuel Outeiriño (1962) o Xabier Cordal (1965). Los dos autores más mozos, Olalla Cociña (1979) y Daniel Salgado (1981), los dos de Lugo y con propuestes poétiques mui distintes, son voces mui interesantes, d'ambición sublime, que nos fain llamentar otra vuelta más la desconocencia que tenemos dende Asturies de lo que se ta faciendo en Galicia: de qué poco nos val compartir con ellos una de les llingües d'Asturies. 

[Reseña d’Antón García publicada nel suplementu «Cultura» de La Nueva España, del xueves 26 de payares de 2015].

SEÑALDÁ DE WALDEN

El remediu

Daniel García Granda

Madrid, Ruleta Rusa Ediciones, 2015

     Al cabu de tres años dende la so anterior entrega, l’interesante “Poemes del últimu salvaxe” (2012), el polesu Daniel García Granda regresa a la poesía de nuevu n’asturianu col llibru que fai’l númberu seis, depués de que los cuatro primeros los escribiera en castellanu. “El remediu” del títulu pue ser un nome propiu, el del llugarín del conceyu Nava, o lo que’l diccionariu define como «manera d’iguar un problema». En realidá da la impresión de que se trata de les dos coses a la vez: El Remediu como remediu. La primer sorpresa topámosla al ver que los trenta y nueve poemes del llibru nun lleven el títulu enriba: figura nel índiz que zarra’l volume. ¿Un error d’edición? Terminamos concluyendo que non, que ye la manera de facenos saber que tamos delantre d’un textu unitariu, un llargu poema que l’autor secuencia en trenta y nueve partes de variada extensión y intención.

Daniel García Granda

     El figurativismu vitalista de la entrega anterior, que volvía la vista a una infancia rural lluminosa y memorable, da pasu agora a una poesía más escura, irracionalista en bona parte de los textos, que reflesiona a ráfagues sobre l’absurdu de la sociedá moderna, tecnolóxica y violenta, economicista, frente a la «belleza» que s’aldovina nuna naturaleza que yá nun ye selvaxe, pero na que tovía se pue «coyer aliendu». La cita de Henry David Thoreau al frente del llibru («esperen, mui bien dispuestos, a qu’otros puedan remediar el mal») da una pista de la filosofía qu’impregna la obra. Thoreau (1817-1862), l’agrimensor trescendentalista americanu, autor de “La desobediencia civil” (d’onde sal la cita), pasó dos años viviendo nuna cabaña al pie d’un llagu, esperiencia que-y valió pa escribir “Walden”, un ensayu que defende la vida llibre y selvaxe. Nesa filosofía inspírase García Granda, faciendo del Remediu’l so Walden particular: «Entós vomitó una caleya dende Walden a El Remediu», escribe nun poema, y esi camín que traza dende’l llagu americanu al llugar navetu necesitó dalguna renuncia: «les pantalles apagáronse, encendiéronse / les sebes».

     Pela mesma caleya que llega Thoreau aporta tamién Yeats, la otra gran presencia del llibru. García Granda aprovecha dalgunos versos del irlandés, cambiando Innesfree pol Remediu, pa dar cuenta d’una naturaleza que los dos identifiquen cola llibertá. Sicasí, nun idealiza’l mediu, quiciabes porque sabe topar la guapura na so degradación: «Ta too tan podre y ta too tan / guapo...». Esa atención a la naturaleza nun lu fai desdexar la esmolición social; hai un poema sobre la marcha negra a Madrid de los mineros asturianos (sentíu, pero menos llograo), referencies a los mártires del islam, a la negación del gritu de victoria («bosa, bosa») de los que salten la valla, una escuela en Rafah que visiten los misiles... Tampoco falta la tenrura, como nos poemes dedicaos a Celia. El llibru camina a base de xuegos de palabres y guapes contraposiciones ente lo cotidiano y lo que nos vienden como importante: la bolsa que baxa’l pá enllena de cebolles frente a la bolsa que sube en Tokio, nel poema central del llibru. Yá sabemos lo que nos pasa, el diagnósticu de la sociedá na que vivimos ta fechu: parálisis, cobicia, cobardía, irracionalidá xuncida al xugu. García permítenos escoyer nel remate del llibru: «Agora sólo queda / trancase tres la portiella o salir / a bramar. / Quita-y broza a la valentía. / Dir a buscar ente díes / el remediu».

BILBO BOLSONA FALA ASTURIANU

El Hobbit n’asturianu

J. R. R. Tolkien

Torna al Asturianu de Miguel Gallego Gómez

Xixón, Terrier, 2014

     Philip Larkin, el poeta inglés, y Kingsley Amis, el novelista, padre de Martin Amis, foron discípulos de Tolkien n’Oxford. El so testimoniu nun dexa nada bien paráu como enseñante d’anglosaxón (especialista nel Beowulf) al creador del Hobbit y compañía: un profesor que falaba mui baxo y de manera incoherente, al que nun se-y entendía nada, qu’apuntaba na pizarra les palabres destacaes ensin apartase nunca de dalantre, y que les borraba enantes de que los alumnos llegaran a lleeles. Ello nun impidió que se dedicara tola vida a la enseñanza, xera que compatibilizó cola creación de la Tierra Media y les histories que pasen nella, amás de formar parte d’Inklings, un grupu masculinu de debate lliterariu nel que coincidió, ente otros, con C. S. Lewis, l’autor de les cróniques de Narnia, y con R. L. Green, editor del diariu de Lewis Carroll.

Dellos miembros d’Inklings

     Si de la creación n’asturianu yá falaba dacuando Aurora Luque sobre la oportunidá que nos regalaba esta llingua de dicilo too de nuevo, cola traducción ocurre lo mesmo, anque cásique siempre un poco más tarde que’l restu de llingües de la redolada. Cuando la moda fantástica remitía en favor d’otru tipu de xuegos, llegaba a les llibreríes esta traducción d’El Hobbit que nos permitió, dende les referencies llingüístiques asturianes, regresar a esi mundu de hobbits, elfos, magos, orcos, nanios y cuélebres, si ye qu’un cuélebre ye lo mesmo qu’un dragón. El traductor, Miguel Gallego, del que nun conozo nenguna otra obra propia o traducida, fai un trabayu correctu, adaptando los nomes y los poemes al asturianu, pero dexando a la vista la manera reiterativa d’escribir de Tolkien, esa «prosa probe» a la que se refirió’l xuráu de los premios Nobel cuando refugaron dá-ylu. A veces al testu asturianu nótase-y dalgo’l sustratu castellanu (usu innecesariu de posesivos, dalgunos «se» que sobren...), tan sutil qu’a la mayoría de los llectores, tamién castellanizaos, ha pasa-yos desapercibíu.

J. R. R. Tolkien

     John Ronald Reuel Tolkien nació en Bloemfontein, entós Estáu Llibre d’Orange (güei Sudáfrica), en 1892. Muerre en 1973. Participó na I Guerra Mundial. Hacia 1917, convaleciente de la fiebre de les trincheres, empezó a trabayar nes histories que lu fairían ún de los escritores más influyentes del sieglu XX, de primeres como destacáu autor de fantasía medievalizante, más tarde como un precursor del ecoloxismu al que veneraron los primeros hippies, y de va poco tiempu p’acá como creador de los mundos imaxinarios que recreó pa nós el cine de Hollywood ensin aforrar detalle, con tola mercadotecnia que lleva arreyada. El primer llibru que publicó Tolkien de tola saga foi esti qu’agora s’ofrez n’asturianu, El Hobbit, la historia de cómo Bilbo Bolsona se suma a la compañía que formen el Magu Gandalf y trece nanios pa robar el tesoru del cuélebre Smaug el Maxestuosu. Ye una obra infantil, escrita ensin pretender que se publicara, solo pa entretenimientu de los más pequeños de la so familia. Editada en 1937, l’éxitu que llogró fexo que la editorial-y pidiera una continuación: los tres tomos d’El Señor de los Aniellos, publicaos ente 1954 y 1955. A pesar d’esi carácter infantil, o quiciabes por eso, El Hobbitt resulta más lleíble que la triloxía, una obra que se detién pordemás en descripciones llingüístiques o xenealóxiques o n’esplicar cómo ye’l mundu de la Tierra Media.    

       

Miguel Gallego, el traductor