Fábules humanes
Pablo Antón Marín Estrada
Xixón, Impronta, 2015
Como
si se tratara de la segunda parte del llibru de relatos que publicó en 2014 col
títulu Un palaciu enllenu ortigues, Fábules humanes avérase a
munchos de los temes que topábemos naquella entrega. Como la mayor parte de les
histories tán contaes en primera persona y como ye fácil identificar al
protagonista col narrador, da la impresión de que tamos delantre d'un llibru de
vivencies personales. Quiciabes por eso, pa que nun nos dexemos engañar
fácilmente, na historia qu'abre esti conxuntu de narraciones la voz que fala en
primera persona ye la d'una muyer. En Fábules humanes nun pue faltar la
cuenca minera onde nació y se crio Marín Estrada, el retratu políticu y social del
tiempu los fugaos (l'hermanu de Nery, ensin nome, enterráu al pie d'una
castañal y que tolos años recibe un ramín de violetes; la muyer d'un
republicanu desaparecíu que pon un espeyu a la entrada casa pa que s'avergoñen
d'ellos mesmos los somatenes y guardies que la importunen...); como Marín
Estrada creció alimentándose con histories de guerrilleros, el protagonista
d'un relatu, enantes de dase cuenta de que tenía «resquildu a les culiebres» y
poca puntería, xugó na Transición a ser ún d'aquellos héroes y recibió instrucción d'un fugáu
de verdá, Kakaramiáu.
Tampoco
falta'l recuentu de los años de lo que llama l'autor la «movida» de les
cuenques, cuando la xuventú s'urbanizó formando tribus y faciendo del consumu
de drogues una seña d'identidá, venti o trenta años atrás. Nestes páxines queda'l
poeta inéditu, agora yá muertu, o Freddy, el trotamundos, que salta d'un poema
incluyíu nel llibru Despidida (2011) pa que sepamos dalgo más d'él. O tamién A.,
aquella moza «d'arniu antigu» que facía al protagonista de «Rúa Xerusalén»
(seique Marín Estrada, si nos dexamos arrastrar pola voz del narrador) dir y
volver kilómetros y kilómetros namás que por acompañala un poco más. Pero nesta
nueva entrega tamién se fai recuentu d'otres esmoliciones del autor: la cultura
china, representada neses breves anotaciones que recueye baxo'l títulu «Cuentos
chinos», reflesiones sobre'l mundu artísticu. Hai vagar p'averase a otros mitos:
los protagonizaos por Leonard Cohen y Janes Joplin a cuenta de que pieslle l'Hotel
Chelsea; o por desvelar quién yera la Macorina inmortalizada por Alfonso Camín
na voz de Chabela Vargas. El poeta Claudio Rodríguez, al que confunde n'Uviéu
con un taxista de Sama, ye'l confidente de la historia titulada «El don de la ebriedá».
 |
| Pablo Antón Marín Estrada |
A
Pablo Antón Marín Estrada (Sama, 1966), qu'alcontró nel periodismu la meyor
salida a la so curiosidá infinita, a una capacidá d'asombru que comunica como
naide, estes cróniques, imaxinatives y perspicaces, tan vives, permíten-y
llevantar acta d'esi mundu propiu que cada vez se fai más anchu y fondu. El
narrador urbanita que ye Marín Estrada asoma nesti llibru en dalgunes ocasiones
a lo rural, maravilláu y certeru. Asiste emocionáu al nacimientu d'un xatín, al
relatu de la muerte d'un maestru de pueblu na escuela, siempre atentu a lo
qu'ocurre al so redor p'acercanos a ello. Un día'l narrador llega a una casa
d'una remota braña y pregunta a la vieya que lu recibe: «¿Y vusté, cómo se
siente equí, tan llonxe de too?», la muyer, que se sabe nel centru del mundu,
respuende con una pregunta na que tán toles respuestes: «¿Llonxe d'ónde?».
No hay comentarios:
Publicar un comentario