REQUIEM POLOS MUERTOS ESPAÑOLES
 |
| Kenneth Rexroth (Indiana, 1905 - San Francisco, 1982) |
Les zárzanes constelaciones xeométriques del iviernu
álcense sobre Sierra Nevada, camino
baxo les estrelles, los pies na curvatura familiar de la
tierra.
Los mios güeyos siguen les lluces d’un avión,
coloraes y verdes, que rellumen pal fondu de les Hiades.
El runfíu de los motores crez, agúzase, desvanezse,
faise finalmente inaudible, y les lluces amortecen
na neblina del sudeste baxo los pies d’Orión.
De la que’l soníu s’alloña siento fríu, y el pensamientu
que m’apodera ponme malu. Veo a España
baxo l’airosu cielu negru, cómo la nieve refuella sele,
llaste y pósase sobre la pálida llanera,
y los homes esperen, apiñaos, atotaos contra’l fríu,
mientres un avión desconocíu-yos pasa perriba. Vuela
pal sudeste, ente neblina, hacia les llinies enemigues,
unos rellumos estópen-y debaxo, nel horizonte.
En desapareciendo la tierra retembla
y el soníu llega apagao. Los homes serenen un momentu
pero esmolécense en cuanto vuelven los pensamientos.
Veo los llibros non escritos, los esperimentos ensin facer,
los cuadros ensin pintar, les vides interrumpíes,
echaes en tumbes cola bandera roxa enriba d’elles.
Veo los aliellos celebros grises estrozaos, con cuayarones,
cadún echáu a la so escuridá, inútil baxo tierra.
Soi solu sobre un tesu de San Francisco de sópitu
atrapáu nuna velea, los cadabres amontonándose
na otra mitá del mundu primen contra mi.
Entós, primero sele y depués rica y con brenga,
siento la voz d’una moza que canta.
Los emigrantes de la esquina tán
nel veloriu del fíu mayor, un camión ensin xofer
escapó pela cuesta pindia y atropellólu,
más voces, unes tres otres, xúntense al cantar.
Orión crucia’l meridianu pa contra l’oeste,
Riguel, Bellatrix, Betelgueuse, marchen ordenaes,
la gran nebulosa brillando tenuemente nos sos costazos.
No hay comentarios:
Publicar un comentario