Miraron equí

11 abr. 2013

UN POCO D’HISTORIA


La Chelita, El Salvador 1992
Ruma Barbero
El Pitu, Tierra Llibros, 2012



     Lo poco que sabemos sobre El Salvador, esi pequeñu país de Centroamérica al que los propios conocen col nome d’El Pulgarcito, ponse de manifiestu lleendo’l cómic La Chelita (El Salvador 1992) que nos entrega Ruma Barbero cola calidez humana, l’atención a los detalles y el didactismu que caractericen la obra d’esti dibuxante asturianu. A los mayores ha sona-yos más el Frente Farabundo Martí (l’exércitu de la guerrilla de la esquierda salvadoreña), o Radio Venceremos, que saber cómo se llama la capital de la república o citar dalgunes poblaciones importantes. Y ye que nes últimes décades del sieglu XX nun resultó raro conocer a dalguién, xente activo, inquieto y comprometío cola esquierda, que s’embarcaba na aventura americana pa echar una mano nes revoluciones en marcha (la triunfante sandinista en Nicaragua, qu’equí se vivió como propia) o na guerra y na paz salvadoreña. Daquella nun sabíamos entá lo que yera una ong, y a los que depués díbemos llamar cooperantes llamábamoslos voluntarios.
     Una d’eses persones yera Charo Borreguero, y na so experiencia personal básase’l relatu principal de la obra de Barbero. Ella va ser La Chelita, que ye como la bauticen en centroamérica non porque fuera rubia como la chela (una de les denominaciones populares de la cerveza), sinón por ser blanca (anque morena) ente una población que cuenta con un importante númberu d’indíxenes. Llega al Salvador nel branu de 1992, cuando yá hai unos meses que se firmó la paz de Chapultepec ente la guerrilla y el gobiernu, y va ocupase en recoyer testimonios de les matances, desapariciones y violaciones ocurríes nos doce años anteriores de la llamada “guerra de baxa intensidá”, que dexó unos setenta y cinco mil muertos. El so trabayu, duru y que la marca fondamente, axuda a elaborar l’Informe pa la Comisión de la Verdá pa El Salvador, redactáu por Naciones Xuníes, qu’intenta, poniendo sobre la mesa los casos más representativos de violaciones de drechos humanos, buscar la reconciliación de les partes.
     El propiu Ruma Barbero (Xixón, 1971) aparez como un personaxe del cómic, al empiezu de l’aventura de facer el llibru, y al final, recoyendo testimonios d’otros cooperantes como Marcelo y “Chaparra” (Lucía Iriarte, qu’escribe’l prólogu), que completen n’epílogu la historia de Borreguero. El llibru ye más un reportaxe humanu qu’una novela gráfica, casi más periodismu que relatu, pero engancha dende’l primer momentu. Ruma Barbero devuélvenos a aquel tiempu con una obra mui documentada y bien estructurada, apasionante y instructiva, que sitúa al Salvador nel mapa y na historia. Pero tamién nos enseña cómo víemos el mundu hai unes décades y cómo dalgunos de los nuesos amigos y amigues taben dispuestos a xugase la vida por axudar a cambialu, solidarios colos más desfavorecíos, comprometíos con una idea incierta de xusticia. Nun cambiaron el mundu, pero ellos yeran otros cuando volvieron.

2 comentarios:

  1. Un saludo Antón: llego a tu blog por una casualidad enorme pero me alegro de ella. Me gusta el comentario que haces sobre "la chelita". Me parece cercano y certero a la vez. Un saludo: Charo Borreguero

    ResponderEliminar
  2. Qué sorpresa, Charo. Un abrazo cordial.

    ResponderEliminar