ECHO DE MENOS A NEL
AMARO
Depués del funeral de la madre de
Jose, mientres esperamos la breda pa comer nuna terraza, pidimos sidra. De
sópitu, na distancia, acolumbro pintada na paré una pequeña silueta familiar.
“Ye Nel Amaro”, digo n’alto de la que me llevanto a comprobalo. N’efectu, ta
pintáu en negro sobre la piedra, con una plantilla, el contornu inconfundible
de la so cabeza baxo la lleenda “N A tuvo equí”. Una intervención del propiu
autor, seguramente, fecha enantes de que lu alcanzara la muerte na primavera
del 2011
.
Pienso entós en Nel Amaro,
l’inquietu creador en busca permanente, impertinente y bonaz al mesmu tiempu,
críticu y constructivu. Nun ye que tuviéramos una especial relación de
camaradería y amistá. El vínculu que nos xunía yera más lliterariu que
personal, pero altravesaba cinco décades, dende’l remate de los años setenta al
empiezu d’esos diez del sieglu XXI qu’él entamó, como siempre, enllén de
proxectos y realidaes. Una relación qu’empezó per carta convencional y acabó a
través d’e-mail, como tien que ser en quien empezó publicando en “vietnamita” y
terminó colgando la so obra n’internet. Conocímonos na seronda de 1977, nun
recital poéticu qu’organizaba l’Ateneo de Oviedo nos locales de la cai
Melquiades Álvarez 7, nel qu’Amaro lleía xunto con José Luis Argüelles y
Dionisio Gómez (l’autor d’aquellos versos qu’empezaben: «Mieres,/ que en la distancia era de plomo se concreta/ bajo la silenciosa llovizna de la tarde...»). Había un presentador, Fernández Canteli, y el públicu
formábemoslu un sociu del Ateneo vinculáu al axedrez y yo, qu’acababa de llegar
de Tuña arranando (ye la palabra) por conocer poetes y por entrar en contactu
cola poesía que se taba faciendo nel mio tiempu.
 |
| Nel Amaro y Pulgu |
Escribi-y mandándo-y dalgún poema,
contestóme, y empezamos una llarga relación intercambiando publicaciones, lo que me
permitió facer un bon siguimientu de la so evolución artística, dende los
poemes axitaos de los años setenta, pasando pela serie mesta dedicada a Marta
B., la poesía comprometida, la superación de la fotocopia, el mail art, la
poesía visual, les intervenciones... Unos quince díes enantes de qu’Ismael
González Arias me diera la mala noticia del so fallecimientu, Nel Amaro mandóme
una convidada pa una acción na Galería Texu d’Uviéu, y tovía enantes llegara
l’últimu regalu visual, “Preso político. Poema objeto”: una semeya de dellos clips
negros nuna cadena que ruempe la presencia d’un clip coloráu. Usáramos esa imaxe
como cartel pa la exposición que fexo na mio Llibería Trabe en payares de 2005,
inaugurada con una serie d’acciones que nos fixeron rir y pensar, como-y
prestaba al poeta de Mieres.
 |
| De Nel Amaro: Preso político. Poema objeto |
Nel Amaro yera imprevisible y
sorprendente. Tengo pa min que yera tímidu, pero nada descubro diciendo que
tenía fuertes convicciones y una humanidá candial y cariñosa. Nel anecdotariu
social que cuerre sobre él hai de too, de grandes excesos a enceses polémiques,
dalguna bofetada a dalgún padre de la patria, la detención pol asuntu del
atentáu de la cai Correo de Madrid, nel que la policía implicaba a la so
hermana (“Mariluz/ n’Asturies/ faltes tu”), una xenerosidá ensin llende y un
espíritu llibre y contradictoriu más cercanu al anarquismu qu’al marxismu,
capaz de conxugar nel so santoral laicu xente tan dispar como Brecht, Cristo, Joplin,
Kerouak, Hendrix, Bartók, Beckett, Otero, Antígona, Brel, Cortazar o
Fernán-Coronas (quixo que publicáramos una foto suya na que ta delantre la
tumba del poeta de Cadavéu). Nun yera un escritor delicáu y primorosu; la so
fuercia creativa venía de la so sinceridá radical y d’una claridá expositiva qu’apoyaba
na intuición.
 |
Ánxel Nava, Nel Amaro y Antón García na inauguración
de la exposición de Nel Amaro na Llibrería Trabe en 2005. |
Foi na Xunta d’Escritores de Llanes (1989), cuando tuvimos
oportunidá de falar más posadamente per primer vez y cuando Nel Amaro me
sorprendió col so saber variáu y informativu. Nun sé cómo un grupu de los
presentes diéramos en falar de Marx, un tema sobre’l que yo confieso que nun
tengo muncho que dicir, siendo como soi poco dau a la llectura de teoría
política. Col so acentu tan característicu de la cuenca na que nació y vivió,
falando a ráfagues, como suelen facelo los tímidos, Nel Amaro diba esbillando
con convencimientu la so opinión sobre l’análisis que Marx y el so camarada
ideolóxicu Engels fixeran sobre lo que llamaben les revoluciones españoles del
sieglu XIX, onde tuviera un papel relevante na segunda (según el cómputu
d’aquellos filósofos) el mio paisanu Riego. Nel Amaro, más favorable a les
tesis anarquistes de Bakunin qu’a la ortodoxia organizativa del marxismu, refugaba
que pudiera dáse-y el nome de revoluciones a les asonaes militares del sieglu
XIX. A la de Riego, por exemplu, la de 1820, esplicaba’l de Mieres que-y faltó
cuayu pa da-y una patada en culu al rei Fernando VII y echalu del tronu. Dicía
que nun se podía falar de revolución cuando se trataba namás d’un cambiu
d’orientación nel que les clases desfavorecíes nun teníen papel nengunu nin
meyora posible.
Poco podía yo aportar a una discusión qu’ensiguida foi
monólogu, porque naide de los presentes sabía que Karl Marx s’ocupara de la
historia d’España, que tuviera una opinión favorable de Xovellanos na midida en
que s’oponía al feudalismu o de Riego, porque cola so actuación permitiera a
les colonies americanes emancipase y llograr la independencia. Alcuérdome que Nel
Amaro, naquel discursu, manifestó pa la mio sorpresa cierta simpatía por
Mendizábal, el responsable de la desamortización de los bienes eclesiásticos,
que según nos dixo venía d’una vieya familia conversa y qu’elli mesmu
camudara’l so apellíu orixinal, Méndez, por Mendizábal, que dexaba un menor
rastru xudaizante. Nun saliera bien la so intención de poner al algame de los
campesinos les tierres de les “manes muertes”, la igresia y les órdenes
relixoses, que trabayaben. Aquelles propiedaes terminaron pasando al patrimoniu
de los especuladores o de los ricos porque nun dexaran a Mendizábal rematar el
procesu.
 |
| De Nel Amaro: Autorretratu |
Pero lo que Nel Amaro dominaba como naide yera la historia
contemporania del valle que riega’l ríu Caudal y del so entornu cultural. Da
bona prueba d’ello nes sos noveles, especialmente na qu’igual ye la más
ambiciosa de les que publicó, ¡¡¡Falanxista!!!
(1995), una obra que de tar escrita n’español diba llevantar angüeñes na so
villa natal, onde los que la lleeron son a identificar a persones conocíes protagonizando
fechos de los qu’igual nun taríen agora nada orgullosos. Como fonte
d’información, poniendo a disposición de cualquier iniciativa’l so archivu
ricaz y suficientemente ordenáu como pa topar nél lo que se precisaba,
resultaba un colaborador impagable y xenerosu. ¿Cómo agradece-y yá que me
mandara los dos llibros de poemes de Virgilio Garsaball, una vez que me quexé
de que nun había manera de lleer a esti poeta revolucionariu asturianu?
 |
| De Nel Amaro |
Que Nel Amaro desbordaba enerxía sábelo cualquiera que
tratara mínimamente con él. Por eso a lo llargo de la vida fundó y desfundó sinfinidá
de publicaciones peles que pasó tola poesía asturiana. Por eso nun momentu
determináu decidió dar vida a colectivos artísticos que formaba él consigo
mesmu, enllenándolos de conteníu baxo nomes tan rescamplantes como Auxilios Mutuos
SL, Yves Klein Blue Bank, Fundiziom
Malevich o la Fundación Perruno-Situacionista Laszlo Kovacs,
na que tenía como colaborador habitual al so perru Pulgu. Na poesía visual, na
intervención, nes acciones, alcontró Nel Amaro la so voz más personal,
permitiéndo-y inmediatez, reflexión y brillu.
Al pie de la
paré dende la que me mira en forma de graffiti, mientres faigo una semeya col
móvil, alcuérdome del poema col que remata Cementeriu
cívicu, el so últimu llibru de poemes publicáu n’asturianu. Son tres versos
que dicen simplemente: “Guapa babayada/ muérreste y/ ¡yá ta!”. Sí, yá ta. Ye
fácil dicilo cuando yes quien muerre, pero los que quedamos vivos echámoste de
menos.
El sistema débeme una chocolatina
