NOTICIA D’UN ESCULTOR OLVIDÁU

Cipriano Folgueras. Una gloria d’Asturies

Lluis Portal

Premiu d’ensayu “Máximo Fuertes Acevedo”

Uviéu, Trabe/Principáu d’Asturies, 2012

     “Asturies escaez pronto a los sos artistes, incluso a los más brillantes”. Asina de rotundu empieza Lluis Portal el llibru Cipriano Folgueras. Una gloria d’Asturies onde repasa la traxectoria d’esti escultor (Uviéu, 1862 – Madrid, 1911) que lleva munchos años enterráu nel ilustre panteón de los nomes de les cais y del olvidu xeneral. Un llibru oportunu porque recibe’l Premiu “Fuertes Acevedo” del añu 2011, xusto cuando se cumple’l centenariu del so fallecimientu, pero tamién raru, porque va tiempu que les monografíes sobre arte lleguen de la mano d’especialistes. Lluis Portal ye un miembru destacáu de la moderna ilustración asturiana, que s’interesa tanto pola lliteratura, l’arte, los vezos (ye autor d’un guapu llibru, Secretos de Pandenes, col que s’avera a la vida tradicional d’esti pueblu cabraniegu), como pola política o la llingua.

     L’averamientu que fai nesti llibru a Cipriano Folgueras, más sociolóxicu qu’artísticu, resulta ilustrativu del abandonu nel qu’anda la cultura asturiana: Portal corrixe la fecha que se suel dar como de nacencia del escultor (10 de setiembre de 1863) pola del 25 de setiembre de 1862. Permítenos siguir depués la peripecia vital del artista, qu’estudia en Madrid becáu pola Diputación d’Uviéu, amplía estudios en Roma, viaxa a París, pa terminar estableciéndose en Madrid, onde muerre cuando tovía, posiblemente, nun algamara la madurez creativa. Folgueras ye un escultor notable, clasicista, dotáu d’una técnica y plasticidá envidiables. Quedó alcordanza d’él como l’autor de medallones y d’ánxeles, quiciabes porque recibió munchos encargos funerarios (Masaveu, Campoamor, frai Ceferino, los marqueses de San Xuan de Nieva...). Apunta Portal que Folgueras tratara en París a Rodin, a través del amigu común Zuloaga, en 1885, anque nun parez que la obra innovadora del francés influyera na delicadeza formal, académica, del asturianu. 

     La mayor parte del llibru ocúpase en describir les obres más relevantes de Folgueras (dacuando ilustraes con dalguna semeya) y la suerte (dacuando mala) que corrieron: la Comedia y la Traxedia que figuraben na fachada del teatru Campoamor d’Uviéu hasta la quema de 1934, los Sagraos Corazones na ilesia de Santa Cruz de Madrid, el monumentu a Manuel Pedregal en Grau... Meyor suerte tuvo la estatua sedente de Valdés Salas nel patiu central de la Universidá d’Uviéu, que sobrevivió al 34. Portal entretiénse contándonos la mala experiencia gallega d’otra obra, la qu’él llama “Les Cellergues” (“Las Cosquillas”, nun sé si ta bien traducir al asturianu los títulos orixinales, ensin señalalo), pero olvida explicar qu’esta obra depositóla’l Muséu del Prado, después de restaurala, nel Belles Artes d’Asturies a primeros d’esti añu 2012, la única del artista que se pue ver na principal pinacoteca asturiana. Dos pequeños pasos, la exposición d’esa pieza y esti llibru, nel llargu camín de recuperar la vida y la obra d’esti olvidáu fíu d’Asturies.

PREMIOS CRÍTICOS DE LES LLETRES ASTURIANES

I Premios Críticos de les Lletres Asturianes

Xunta pola Defensa de la Llingua Asturiana

2012

     Nos primeros meses del 2012, la xunta directiva de l’Asociación d’Escritores d’Asturies, que preside Mariano Arias, tomó’l determín de nun convocar pa les modalidaes d’asturianu los Premios de la Crítica que concediera nos nueve años anteriores. Apoyábase na falta de recursos económicos y de colaboración por parte de los escritores que se manden del asturianu. Entrambes coses han ser ciertes, ensin dulda, y l’AEA ta nel so derechu de promover y difundir como tenga a bien la obra de los escritores n’Asturies, pero l’apurada salida de Pilar Sánchez Vicente de la presidencia en 2011, con parte de los miembros de la so xunta directiva, yá facía suponer que l’interés pola llingua asturiana na Asociación nun diba crecer muncho.

     L’asturianismu cultural reaccionó ente l’afrenta promoviendo un manifiestu de quexa, pero foi la Xunta pola Defensa de la Llingua Asturiana, una asociación de carácter reivindicativu, la que decidió convocar unos Premios Críticos de les Lletres Asturianes pa esti 2012, más como respuesta al posicionamientu de l’AEA que por convencimientu propiu. D’esta manera, el pasáu vienres 30 d’avientu, na Galería Texu d’Uviéu, la Xunta organizó un actu cenciellu y guapu, presentáu por Miguel Rodríguez Monteavaro y Llucía Menéndez, pa facer la entrega de los Premios. Recayeron nos llibros La mio hermana ye una mofeta, de Berta Piñán (lliteratura infantil); De totalitarios a demócrates, de Pablo Rodríguez Alonso (ensayu) y El sol negru de Wewelsbur (novela) y La ñeve del cuquiellu (poesía), entrambos de Xabiero Cayarga. Los galardonaos recibieron una obra de l’artista Mónica Álvarez Viña y los organizadores destacaron el fechu de que los tres premiaos residan fuera d’Asturies, en Madrid, Bretaña y Alemania respectivamente.

     La Xunta pola Defensa de la Llingua insistió nel carácter transitoriu d’esta convocatoria, convencida de que nel futuru han ser los propios escritores n’asturianu y les sos editoriales los que garren el testigu. Pienso, sicasí, que paga la pena que la Xunta, organizadora avezada de conciertos musicales y exposiciones artístiques, s’ocupe tamién de la creación lliteraria con esti o con otros proyectos. Per varies razones, ente otres pola capacidá de convocar y atropar a públicos nuevos: l’otru día, acudieron miembros de los diferentes xuraos y dellos escritores (Roberto González-Quevedo, Pablo Texón, Esther Prieto, Xosé Miguel Suárez, Héctor Xil, Rafael Rodríguez Valdés...), en definitiva, la xente que suel participar nestos actos; y, xunto a ellos, destacaba un públicu heteroxeneu y numberosu, poco habitual nos actos lliterarios al usu. Nun taba de más que se llograra, a través de la Xunta, normalizar la relación ente esi asturianismu reivindicativu y la lliteratura asturiana.

DEPUÉS DE LA MODERNIDÁ

El sistema débeme una chocolatina

Pablo X. Suárez

Xixón, Suburbia, 2012

     A finales de los años setenta llamentábase un poeta amigu de que n’Asturies nun se pudiera escribir poesía underground porque nun había metro. Ignoraba aquel poeta xoven (que dio n’adultu, perdiendo’l sustantivu) que la contracultura nun precisa de subterráneos explícitos, sinón que ye un estáu de la conciencia. Dende’l so primer llibru, Asturiana beat (2005), Pablo X. Suárez posiciónase nesa escena contracultural, construyendo un discursu poéticu qu’alterna n’asturianu y n’español (Pop retórika, 2010), pero con bonos frutos narrativos tamién. Anque l’autor parez que da voz a la marxinalidá captando’l feísmu que nos arrodia, quien s’asome a El sistema débeme una chocolatina, la so última entrega poética, podrá comprobar que les relaciones sobre les que reflexiona resalven esa condición marxinal pa conformase como parte central d’una sociedá na que podemos reconocenos, inclusu como actores: “Nes nueches d’avientu, mientres la xelada/ manga sábanes blanques nes llunes de los coches/ la xente busca’l calor de les cafeteríes de pueblu/ y sentao al rodiu de ceniceros de propaganda de Mahou/ diserta sobre la vida de los otros”.

     Pablo X. Suárez (Orviz, 1981) mira alredor y apúrrenos nesti breve llibru (dieciséis poemes) fragmentos de la vida d’esos otros, componiendo un retratu social del nuesu tiempu fechu dende la perspectiva crítica d’un observador agudu. Ehí ta la sociedá refalfiada (nun entráramos en crisis cuando s’escribió) frente a los senegaleses de los cds, que namás tomen un café nel bar cuando xuega’l Barça la champions; o descripciones como l’abanicu social, desglosáu en tantos por cientu, del «Campillín», la so personal «Patria» nel poema que lleva esi títulu o la inocencia por omisión n’«Estructura»... Pero tamién hai sitiu pa una mirada hacia dientro, como buscando nel nenu solitariu qu’enredaba a les chapes emulando les xestes ciclistes de Perico Delgado, o nel que xugaba al fútbol infantil (con aciertu, ventitrés goles nuna temporada) dalguna enseñanza que permita al adultu mirar “de frente a onde l’azar tea”. 

     Procuramos afuxir de determinaes etiquetes pa nun cayer nos llugares comunes que van camín de convertise, pero lo cierto ye qu’el términu posmoderna ayuda a entender bien la propuesta lliteraria de Suárez: el so ruralismu urbanu, tan identificativu de l’Asturies actual, ye’l más claru exemplu d’aldea global al pie de la lletra; el xuegu, l’humor negru, la cultura beat y pop, la contracultura, la nueva sicodelia, una sexualidá más abierta, una ordenada anarquía, l’antiformalismu, la necesidá de difundir el mensaxe por medios alternativos como la performance o l’actuación... son rasgos que definen tanto la posmodernidá como la obra d’esti autor, animador de les nocturnes «Timbes Poétikes» y una de les voces más vives, desenfadaes y singulares de la poesía que se ta faciendo agora.

UN POEMA DE RANDALL JARRELL (1914-1965)

Randall Jarrell

LA MUYER NEL ZOO DE WASHINGTON

Los saris de les embaxaes pasen pel mio llau.

Tela llunar. Tela d’otru planeta.

Miren el lleopardu como mira’l lleopardu.

Y yo...

            el mio estampáu, que caltién el color

vivo depués de tantes llavadures; esti azul marín

esmaltáu y inesistente que pongo pal trabayu, y depués de trabayar

y pa dir a la cama, y cuando vaya pa la tumba, ensin

quexes, nin bilordios: nin del mio xefe,

nin del axudante del subdirector, nin del xefe d’él...

Namás me quexo... d’esti cuerpu tan

prácticu que’l sol nun destiñe, que nenguna mano cubre

pero que, cúpula abesida, se consume ente columnes,

sinuosu baxo les fontes –pequeñu, apartáu y brillante

a los güeyos de los animales, esos seres atrapaos

lo mesmo que yo, pero nin yo nin ellos somos la trampa,

avieyando, pero ensin conciencia de la edá,

a salvo equí, ensin saber de la muerte, porque la muerte...

¡oh, barrotes del mio cuerpu, abríivos, abríivos!

Pasa’l mundu per delantre la mio xaula y nun me ve.

Y nun vien por min, sinón por ellos, los animales

selvaxes, los gorriones que comen el granu de les llames,

les palombes que se posen nel pan de los osos, les aigles

qu’esmesen carne atacao de mosques...

                                                                        Utre,

de la que vas buscar la rata blanca que les raposes dexaron,

quita’l cascu bermeyu de la cabeza, les negres

nales que me dieron solombra, y ven a min fechu home:

hermanu salvaxe, los llobos blancos inclínense a los tos pies,

la gran lleona avérase maxestuosa, rinxendo,

a la to mano poderosa...

                                    Sabes quién yera yo,

mira lo que soi agora: ¡cámbiame, cámbiame!

MEMORABLE POESÍA

La ñeve del cuquiellu

Xabiero Cayarga

Premiu «Teodoro Cuesta»

Uviéu, Trabe, 2011

     Tien ún la impresión de que, de nun ser pol premiu testimonial que la Tertulia Reciella Malory del Entregu concedió a La ñeve del cuquiellu como meyor llibru del 2011, la cuarta entrega poética de Xabiero Cayarga diba pasar desapercibida. Y eso qu’esta obra llegara respaldada por otru gallardón, el «Teodoro Cuesta» que vien convocando l’Ayuntamientu de Mieres dende hai dos décades. Igual los cambios na política municipal y autonómica son los responsables de qu’esos venti años de premiu, que coincidieron cola concesión a Cayarga, nun tuvieran la celebración que sí mereció al cumplir los diez (y que ganó tamién Cayarga col llibru Pequeña Europa) o los quince años, cuando reunieron en sendos actos públicos a los anteriores ganadores, qu’acudieron de manera desinteresada.

     La ñeve del cuquiellu ye un de los llibros de poesía más notables d’ente los publicaos últimamente. Ensin abandonar la llinia reflexiva y clara que yá conocíemos de les anteriores entregues de Xabiero Cayarga, coles qu’esti llibru caltién continuidá temática y formal, vuelve l’autor a apurrinos un memorable puñáu de poemes nel que podemos reconocenos y conocenos meyor, porque anque seya evidente la peripecia biográfica de Cayarga, el mensaxe consigue trescender y reflexar les esmoliciones del nuesu tiempu. Quiciabes la sutil ironía, más clara nos otros llibros, se vuelva más opaca nesti, onde l’autor fai una equilibrada indagación sobre cómo, ensin dexar de ser nós mesmos, va cambiando la nuesa manera de pensar, como si asumiera’l protagonismu de les nueses vides esi doble del que traza’l perfil mañaneru nel poema “L’otru”.

     La so poesía fala de la decadencia del mundu que conocimos na infancia, representáu por esa güela yá muerta a la que’l nenu acuta’l bancu nel parque, convirtiéndose cada poema, pola maxia de les palabres, nun llugar d’abellugu onde la experiencia de lo cotidiano consigue alcontrar sitiu. Nestos trenta poemes, encontándose na so memoria de llector atentu y na descripción de la naturaleza y nos cambios estacionales, Cayarga danos cuenta del so trabayu como profesor nun país estranxeru, d’aquello que pue apurrir una mirada casual, fálanos de les sos vivencies como viaxeru qu’atopa otres llingües y que conoz mundos nuevos nos qu’apetez quedar, pero que tamién regresa a casa y fai recuentu de les histories familiares, como ocurre a partir del so propiu nome, esi Xabiero que vien del vascu “etxeberria”, casa nueva, que-y permite volver sobre’l llar que dacuando pensamos ayudar a construir colos regodones de la llingua: “Caída la casa encantada/ esmoroñaos los castiellos/ del aire, impónse la xera/ ingrata y necesaria/ de construir col escombriu/ de la conciencia./ Polvu somos: tierra”. Un llibru mayor esta entrega de Cayarga, sobriu, fondu, emotivu, enllén de precisu sentíu constructivu.