Miraron equí

17 sept 2014

CHICHESTER, ARUNDEL Y PHILIP LARKIN

LLECTURES DE LARKIN

     Conocía’l poema de Larkin, pero foi una sorpresa prestosa topalu apegáu a un pilar de la nave central, al pie d’una d’eses tumbes del matrimoniu donante con perrinos a los pies. La catedral de Chichester ye guapa, lluminosa, espaciosa, acoyedora. Como la mayor parte de les d’Inglaterra, conserva la tradición gótica con añadíos modernos qu’a min me presten muncho, como una vidriera de Marc Chagall o cuadros de Graham Sutherland. Leonard Bernstein compunxo los sos Salmos de Chichester por encargu de la catedral. Puedes comer nel claustru, facer fotos y anduliar llibremente per ella. Nin tan siquiera cobren entrada.


     En 1955, Larkin tuvo tamién nesa catedral acompañando a Monica Jones, onde reposen el décimu conde d’Arundel, Richard FitzAlan (1313-1376), de la mano de la segunda muyer, Leonor de Lancaster (1318-72). El poema qu’escribió inspiráu nesa tumba féxose mui famosu, pasando a ser llectura habitual en funerales. Publicólu nel llibru Les bodes de Pentecostés (1964). Tanta fama nun parez que-y encartara muncho a Larkin, que cansó del poema o a lo menos d’un éxitu que nun esperaba. Pero eso nun lu llibró de que nel so propiu funeral, laicu, Jill Bacon-y diera llectura, la muyer del poeta Cecil Day-Lewis.

Philip Larkin

   Les versiones al español que conozo caltienen la mesma interpretación del poema, la que correspuende a un textu que se llee con solemnidá nos funerales. Pero nun sé yo si esti poema nun tendrá n’inglés otra llectura mui distinta: baste saber que’l verbu inglés to lie, que toos traducimos les veces que sal como «xacer» o similar, tamién significa «mentir». Nun ye lo mesmo que la pareya ignorara que diba xacer por tantu tiempu, a que fuera a mentir pa tola eternidá...
     Parez ser qu’al final del borrador d’esti poema, Larkin escribió: «L’amor nun ye más poderosu que la muerte porque dos estatues tean garraes de la mano seiscientos años».

Antón García na tumba de los Arundel (Chichester)


UNA TUMBA PA LOS ARUNDEL

Philip Larkin (Traducción asturiana d’Antón García)

Llau a llau, les sos cares esborraes,
xacen en piedra el conde y la condesa,
los hábitos formales que se muestren
como una armadura, reques les pliegues
y esi llixeru niciu del absurdu:
los perrinos echaos baxo los pies.

Esta cenciellez d’antes del barrocu
nun llama l’atención, hasta que’l güeyu
da col guantelete vaciu del conde,
na esquierda, que l’otru garra; y alviértese,
con una tienra y sópita emoción,
qu’esa mano, respisa, tien la d'ella.

Nun pensaron xacer per tantu tiempu.
Esa fidelidá n’efixe yera
un detalle namás pa los amigos;
una gracia d’encargu a un escultor
qu’axudara a caltener, alredor
de la base, los nomes en llatín.

Nun pensaron no rápido que l’aire,
nel so supinu viaxe estacionariu,
diba volvese dañu silenciosu
faciéndolos inquilinos anónimos;
no rápido que los güeyos siguientes
empiecen a mirar, non a lleer. Tiesos

aguanten, xuntos, a lo llargo y ancho
del tiempu. Nevó ensin fecha. Pel branu,
la lluz inundó'l vitral. El reclamu
llustrosu d’un báramu chiscó’l suelu
estráu de güesos. Y pelos caminos
aportó infinita xente, distinto,

esllavazando la so identidá.
Agora, desamparaos nel vaciu
d'una edá ensin heráldica, un duernu
onde flota una madexa de fumu
sobre los zalegos de la so historia,
tan solo permanez una actitú:

el tiempu foi volviéndolos a ellos
mentira. La so fidelidá en piedra
que nunca pretendieron convirtióse
nel so blasón final y prueba ser
el nuesu casi instintu casi ciertu:
lo que de nós sobrevive ye amor.




AN ARUNDEL TOMB

Side by side, their faces blurred,
The earl and countess lie in stone,
Their proper habits vaguely shown
As jointed armour, stiffened pleat,
And that faint hint of the absurd —
The little dogs under their feet.

Such plainness of the pre-baroque
Hardly involves the eye, until
It meets his left-hand gauntlet, still
Clasped empty in the other; and
One sees, with a sharp tender shock,
His hand withdrawn, holding her hand.

They would not think to lie so long.
Such faithfulness in effigy
Was just a detail friends would see:
A sculptor’s sweet commissioned grace
Thrown off in helping to prolong
The Latin names around the base.

They would not guess how early in
Their supine stationary voyage
The air would change to soundless damage,
Turn the old tenantry away;
How soon succeeding eyes begin
To look, not read. Rigidly they

Persisted, linked, through lengths and breadths
Of time. Snow fell, undated. Light
Each summer thronged the glass. A bright
Litter of birdcalls strewed the same
Bone-riddled ground. And up the paths
The endless altered people came,

Washing at their identity.
Now, helpless in the hollow of
An unarmorial age, a trough
Of smoke in slow suspended skeins
Above their scrap of history,
Only an attitude remains:

Time has transfigured them into
Untruth. The stone fidelity
They hardly meant has come to be
Their final blazon, and to prove
Our almost-instinct almost true:

What will survive of us is love.


16 sept 2014

EL LLIBRU INTERMINABLE

Llibru del desasosiegu

Llibru del desasosiegu
Fernando Pessoa
Traducción d'Henrique G. Facuriella
Uviéu, B. Alto, 2014

     Cuando muerre en 1935 en Lisboa, Fernando Pessoa tien 47 años. La obra que dexa publicada limítase a Mensaxe (1934), dellos poemes n'inglés y poco más. Pero nel so «espólio» (los bienes que dexa’l fallecíu), quedó una arca con material de Pessoa pa entretener a los estudiosos del futuru: 29 cuadernos y 27.543 documentos, 25.426 orixinales propios. D'esa arca salen a partir de los años cuarenta los poemes de la so creación más singular, los heterónimos: poesía d'Álvaro de Campos, Ricardo Reis y Alberto Caeiro, y testos firmaos col nome del propiu poeta.
     Nesa arca taba ún de los proxectos pessoanos nos que más empeñu punxo: el Llibru del desosiegu, como lu llamábamos n'asturianu, "del desasosiegu" a partir d'esta traducción. Trátase d'un conxuntu de proses nes que trabayó dende 1913, pero que toma cuerpu ente 1929 y 1934, años a los pertenecen la mayor parte de los fragmentos que lu componen y que Pessoa adxudica a "Bernardo Soares, axudante de teneduría na ciudá de Lisboa". Nes primeres páxines de la traducción asturiana, un "prefaciu" del propiu Pessoa preséntanos a Soares: trenta años, flacu, encorváu, un poco desdexáu nel vistir, aire de sufrimientu, frugal, fumador, observador... Pessoa tien esplicao que Soares nun ye un heterónimu, sinón un personaxe lliterariu: "Soi yo menos el raciociniu y l'afectividá".
     En vida, Pessoa llegó a publicar malapenes una docena de los más de quinientos textos que componen el llibru. La primer edición, fecha por Jacinto do Prado Coelho, ye de 1982, casi a los cincuenta años de que falleciera'l poeta. A partir d'esi momentu sucédense les ediciones y la manera na que'l llector pue acceder a unos materiales que Pessoa dexó escritos en fueyes sueltes, ensin un orde determináu. Asina, la de Coelho taría ordenada por grupos temáticos; António Quadros (1986) foi partidariu d'intentar devolver al llibru'l desorde d'un diariu; Teresa Sobral Cunha (1991) busca una hipotética ordenación cronóloxica, atendiendo tamién a les diferencies d'estilu (atribuye a Vicente Guedes la coautoría, un nuevu personaxe del "drama en xentes" de Pessoa). Richard Zenith (1997, revisada depués), traductor al inglés, tamién s'ocupó de la edición, refugando la doble autoría y proponiendo una organización suxetiva del material.
     Sobre estes cuestiones salta Henrique G. Facuriella al ofrecenos una traducción que sigue'l testu fixáu por Leyla Perrone-Moisés (la so edición ye de 1986, fuera d'estes polémiques), anque recueye aportaciones de Zenith, como la división del llibru en dos bloques, "Autobiografía ensin fechos" y "Los pasaxes grandes". Na edición asturiana échase en falta un prólogu que sitúe'l llibru ("una semeya fecha con palabres, la única materia capaz de captar los llugares más recónditos de l'alma" en palabres de Zenith) nel contestu de la obra pessoana y que punxera al día la so peripecia editorial. Porque al final, anque lo escrito por Pessoa siga siendo lo esencial y tea nesta traducción eficaz, Facuriella escueye ente les disntintes posibilidaes pa ofrecenos n'asturianu la so propia idea del Llibru del desasosiegu, un llibru inacabáu pero que deberíamos ver más como una obra interminable qu'ensin terminar. 
Fernando Pessoa

1 jul 2014

LO MARAVIOSO DE CADA DÍA

Un palaciu enllenu ortigues
Pablo Antón Marín Estrada
Xixón, Suburbia, 2014



       Si hubiera que señalar dos llibros pa resumir les expectatives abiertes pa la lliteratura asturiana a partir de los años ochenta, yo indicaría dos firmaos por Pablo Antón Marín Estrada: les entregues que publicó del so diariu, "Agua que pasa" (1995) y "Suma y sigue" (1998). Por supuestu, nun son los únicos que podíen valir como modelos, nin van ser la obra mayor d'esti poeta y narrador xenial, que tanto almiramos, pero esa contribución al xéneru diarísticu, desconocíu nesta lliteratura hasta la publicación d'esos dos volúmenes, daba la impresión de normalidá, de que llográramos la madurez creativa, una industria cultural, de que por fin tábemos dientro d'un sistema lliterariu que se podía llamar asturianu. Les reflesiones intelixentes y apasionaes de Marín Estrada sobre la vida y la escritura, la descripción del momentu social, el repás de les novedaes lliteraries, les noticies d'otros escritores, de tertulies y llectures..., facíennos creer que tábemos dientro, o a lo menos a un pasu de llograr la tan ansiada normalización, que nun ye otra cosa que poder desenvolvese n'asturianu ensin tener que tar xustificándose una y otra vez.
       Por desgracia, esta lliteratura necesita xustificación pa siguir siendo, agora como hai trenta años (quiciabes más qu'entós), y tamos mui lloñe de cásique too, especialmente d'una mínima profesionalización, imprescindible pa llograr esa normalización. Media docena de profesionales yera lo esperable a estes altures. Ún d'ellos tendría que ser Pablo Antón Marín Estrada pol so talentu creativu, dende llueu, pero tamién pola constancia nel trabayu y l'arrogancia cola que nos apurre día a día'l so llabor. Marín Estrada ye autor de dalgunos de los meyores llibros d'estes últimes décades; ye prolíficu, fértil, d'esos que necesiten contactu habitual col públicu pa dar salida a una producción caudalosa y mui rica. A la lliteratura asturiana, siempre colos llectores alcanzaos, da la impresión de que-y gusten más los autores d'obra escasa. Asina foi qu'hubo un momentu en que Marín Estrada, quiciabes sintiéndose poco arropáu, anunció que nun publicaría más. Por suerte, internet vieno a axudalu a difundir los sos escritos y a nós a recibilu acaldía como quien abre les noticies de la mañana.

       Nos últimos llibros que publica, vida y lliteratura van cada vez más xuntos, tanto nos poemes como nos relatos. Va tiempu qu'él mesmu, y la familia y amigos, son los principales personaxes de les sos histories, enllazando asina estes últimes entregues con aquellos diarios de los años noventa. Ye lo qu'ocurre col llibru qu'acaba de sacar, Un palaciu enllenu ortigues, onde recueye relatos que foi adelantando peles redes sociales, pero que xuntos componen una crónica impagable de lo maravioso no cotidiano que caracteriza la so obra. Equí topamos el retratu de la vida social de les cuenques nes últimes décades (memoria propia d'un nenu que se crió per ende y memoria de los sos mayores, como la del güelu Estrada, la del tallista de bales o la del Zamorano), pero con importantes novedaes: Galicia, referencia lliteraria constante pa él, llogra materializase alredor de les histories de Valga (la Bella Otero, el Crupier...). Otres Asturies, Portugal y Miguel Torga, el País Vascu, Irlanda y les distintes personalidaes del revolucionariu Charlie Regan, la lliteratura china, una aventura caribeña... asomen nestes histories poles que nos trai y nos lleva fascinaos Marín Estrada ensin que sepamos nunca ónde termina la realidá y empieza la fabulación. Pero con un empeñu: que tamién Asturies dure mil primaveres más.

30 may 2014

RAMPER, HUMOR VAQUEIRU

Gila, al teléfonu
               Na televisión, aprovechando que ye la fin d’añu y qu’hai que facer memoria a baxu costu, echen un programa que nos quita unos años d’enriba a los que yá doblamos con seguridá la mitá del mapa del tiempu que nos correspuende vivir. Gila, aquel humorista tan seriu y absurdu, ta echando otra vuelta los sos monólogos de siempre, enlataos, y ye posible que seya la primer vez que los veo en color. Primero sorrío y ensiguida entro al trapu y paso a formar coru coles rises que suenen de fondu cuando fai los sos chistes sobre la guerra y l’enemigu, sobre la muyer o un paletu, mientres llama per un teléfonu al qu’hai que dar vueltes a un discu pa marcar el númberu. Gila nun yera un humorista del mio tiempu, sinón de la llarga y escura posguerra que yo nun viví, pero llegó vivu a la Transición y el so antimilitarismu cordial, el so esquierdismu antigu y l’aura de persona a la que fusilaron unos moros borrachos que nun acertaron nin un tiru, conoció un nuevu momentu de gloria, quiciabes porque namás tenía que midise contra Pajares y Esteso, contra Lussón y Codeso (que facíen humor a morraes), contra los Hermanos Calatrava o contra Pepe da Rosa y el camión de chirimoyas del teniente Kojak.
Ramper, cola cara llavada y maquilláu
            Pero coincide que toi viendo a Gila acompañáu por un grupu de xente que nun cumplió los venti años y a naide-y fai gracia esi humor ente malhumoráu y resignáu, que-yos suena a tiempu d’antiguamente (como diría Felipe Prieto), y pienso en que ye posible que l’humor tenga fecha de caducidá, o que precise contextu, y que pa disfrutar d’él necesitemos cierta empatía, ponenos en situación o simplemente tener ganes de rir. O quiciabes seya que si ún s’aveza a la “gracia” de Paz Padilla, por poner un exemplu d’agora mesmu, seya difícil, imposible, volver atrás. A min gústame l’humor de Jerónimo Granda, que manexa con igual remangu la intelixencia que’l sal gordo según convenga, pero que tamién sabe facer rir aprovechando’l contextu asturianu como naide; tamién la ignorancia del so públicu. Nuna ocasión na qu’actuaba nun pub, Granda remató una comparación diciendo qu’aquello yera como traducir l’Evanxeliu de Matéu al bable y que lo publicaran en Londres; el local estalló nuna carcaxada, seguramente porque los presentes ignoraben qu’ocurriera realmente, la traducción al bable del evanxeliu y la publicación en Londres en 1861.
Tip y Coll
            Gila yera un humorista de posguerra, y quiciabes por eso mio padre disfrutaba con ganes d’aquella guerra surrealista (los dos, Gila y él, fixeran la de verdá). Pero’l gran humorista del so tiempu, según dicía, yera dalguién del que güei pocos s’alcuerden: Ramper, al que mio padre llegara a conocer personalmente y pol que sentía la devoción de quien fala’l llinguaxe del humor del to tiempu, del que manexa les claves del contextu. Nos años cuarenta, yá al final de la so vida artística na compañía teatral de Juanita Reina, Ramper salía a escena a parodiar al recitador profesional Pepe González Marín y echaba un “Romance de la viajera que nadie sabía quién era”, un textu de Quintero, León y Quiroga qu’imitaba los romances xitanos de García Lorca y que facía les delicies d’un públicu habituáu a sentir n’escena los versos de los poetes más conocíos del momentu. Solo nesi contextu podía resultar eficaz el recitáu de Ramper, que falaba d’una muyer estraperlista.


           Na vida civil Ramper, que tenía oríxenes vaqueiros, llamábase Ramón Álvarez y yera’l mayor de munchos hermanos. Naciera en Madrid en 1892, pero’l padre, carboneru na capital, yera de la braña de L’Abedul, esi llargu y cuestu pueblu del conceyu Miranda que queda al pie del picu Pena Manteiga. Ramón pasara de nenu unes temporaes nel pueblu del padre, que nun-y gustaba especialmente: siempre había muncho que facer y poco que ver. Prestába-y más el Madrid bulliciosu de finales del sieglu XIX, colos sos teatros de varietés, el circu o la Gran Vía. De la estancia na Abedul quedára-y un vocabulariu vaqueiru qu’él adaptó al so modu n’escena, sobre manera nos empiezos de la so carrera artística, cuando mecía humor y equilibrismu. Empezó a ser conocíu por un númberu nel qu’esguilaba espaciquín hasta una siella puesta enriba d’una mesa, contando ensin abocanar chistes, cosadielles, colmos y parecíos. Cuando empezaba’l númberu dicía, asina n’asturianu: “Güeno, pos voi p’arriba”.


           Actuaba xunto col so hermanu Pedro, formando’l nome artísticu col nome de los dos: “ram” de Ramón y “per” de Pedro, al que llamaben “Bisagrita” pola so habilidá como contorsionista.  Poco a poco les sos parodies fueron ganando terrén a les sos contrastaes destreces equilibristes, y los sos númberos diben enllenándose d’humor. Facía una parodia de llucha grecorromana, otra de danza oriental (imitando les de la internacional Carmen Tórtola Valencia), foi mui popular el númberu d’hipnotismu que facía col so hermanu, los de tresmisión del pensamientu, la so versión de la canción del “Relicario” que cantaba Raquel Meller... En 1920, nun accidente na playa de San Sebastián, muerre Pedro, y a partir d’esi momentu Ramper dexó de ser un dúu artísticu pa ser el nome col qu’actuaba’l caricatu Ramón.


            Como suel ocurrir, la mayor parte de los chistes políticos del momentu atribuíense a Ramper, anque ye probable que non toos fueran d’él. Sí parez qu’en 1931, a empiezos del mes d’abril que diba trayer la II República y l’exiliu d’Alfonso XIII, salió a escena y preguntó al públicu: “¿A que nun sabéis qué xabón usa’l rei?”. Y ensin dexar que naide aventurara una respuesta añadía él: “Sales d’España”. La guerra pasóla Ramper en Madrid, actuando gratis a beneficiu del Socorro Rojo. Cuenten que nuna ocasión presentóse n’escena cargáu de retratos de políticos y púnxolos en suelu, arimaos a les meses y les sielles: Azaña, Negrín, Largo Caballero, Miaja... Hasta que quedó nes manes con tres retratos. Miró alredor ensin tener sitiu pa posalos y a la fin decidióse. “A estos trés lo meyor va ser colgalos”, y enganchó nos claos d’una columna les semeyes de Franco, Mola y Queipo de Llano.
            N’otra ocasión, tamién en plena guerra, contó un chiste escatolóxicu, mui del gustu del so tiempu (sobre’l mesmu tema y pel mesmu tiempu fexo’l mierense Anxelu un monólogu similar): Diba en metro cuando salió un golor insoportable d’un señor que llevaba al llau. “Oiga, por favor”, díxo-y, “nestos tiempos d’escasez, ¿ónde compra usté les fabes?”. “¿Cómo sabe usté eso”, preguntó’l señor asustáu. “¡Son coses que se güelen ensiguida!”. Esa mesma nueche la España qu’escuchaba les charles sevillanes de Queipo de Llano pudo oyer aquel chiste que contara Ramper nel Teatru Calderón, que’l militar africanista ponía como exemplu de la fame que se taba pasando en Madrid.



            Na posguerra salvó a Ramper que nun tenía malicia política y que tolos chistes que circulaben contra Negrín y Azaña se-y atribuíen a él. Pero aquel yá nun yera’l so tiempu y yá nun se repetíen los clamorosos éxitos de les primeres décades del sieglu XX. Cuando muerre en Sevilla en 1952, onde ta de turné, ye un payasu triste tan probe como vivió siempre, anque llegó a ganar sumes fabuloses de dineru que se-y esguilaben d’ente los didos cola mesma facilidá que llegaben, pa desesperación d’Aurina, la so muyer asturiana. Nos últimos años ye consciente de que’l so humor ta fuera de contextu, pero igual que Gila nel especial de la fin d’añu, siempre atopa sobre les tables el reconocimientu señaldiosu de quien lu vio na xuventú y ri pa quitase unos años d’enriba.

29 may 2014

HISTORIA D’UN NOVATOR


Pedro Antonio de Peón Duque de Estrada
(Un reaicionariu modernu n’Asturies del XVIII)
Xuan Pedrayes Obaya
Prólogu de Lluis Miyar Figaredo
Villaviciosa, Cubera, 2014.

     A naide se-y escapa la importancia d’Asturies na ilustración, cubriendo con tres personalidaes les etapes principales del sieglu XVIII: Feixoo, Campumanes y Xovellanos. Suel ocurrir que’l brillu d’estes trés figures faiga que pasen desapercibíos otros munchos asturianos del so tiempu, personaxes a los que pasu ente pasu se-yos va emprestando atención historiográfica, xeneralmente dende l’ámbitu de la investigación universitaria. Ye más raro topar, como nesti casu, una obra divulgativa fecha n’asturianu, como esti averamientu a la vida y al periodu históricu de Pedro Antonio de Peón, Duque d’Estrada, (1683-1750), que nos ofrez dende Villaviciosa Xuan Predrayes Obaya, arquitectu y escritor.
    Como señala nel prólogu’l profesor eméritu de la Universidá de Minnesota Lluis Miyar, “l’autor llévanos de viaxe per un tiempu 300 años vieyu, a un llugar onde la oligarquía clerical y aristocrática yéralo tou; una sociedá estamental, endogámica, con un esmoledor oldéu a l’Asturies d’anguañu (onde se diz oligarquía lléase casta política)”. N’efectu, a lo llargo de tol llibru, ampliamente ilustráu, Pedrayes fai puntuales comparances d’aquel tiempu históricu cola nuesa época, a veces de manera críptica: ¿a qué se refier cuando afirma na páxina 105 que Peón “tuviere más con Alfonso Guerra que con Montesquieu”? Nun lo esplica. Pero’l retratu social d’esi momentu históricu anterior a les primeres lluces de Feixoo resulta apasionante, dibuxando’l panorama de la oligarquía fidalga asturiana y de cómo la casa de los Peón, pendiente siempre de la figura del mayorazu, miedra hasta convertise nuna de les principales de Villaviciosa nel XVII, siguiendo un patrón común a les demás cases: “la herencia presllada, les miseries del tratu colos llevadores, les fataes feches pa enanchar el llinaxe, la vanidá, los pleitos coles Cases vecines, la folganzanería...”.
     Pedro Antonio de Peón, “cuciu y sapiente; esmolíu, cartesianu, poderosu”, preséntasenos como un personaxe singular, influyente nes instituciones asturianes (Xunta Xeneral, Catedral, Audiencia, ayuntamientos, confradíes, l’Hospiciu...), tomando partíu na Guerra de Sucesión polos borbones. Llevantó l’almiración de González Posada, quien dixo d’él: “Introduxo’l gustu de la llingua francesa nel so país; apinólu de llibros necesarios pa la navegación, el comerciu y l’agricultura, faciendo ver que’l tarrén asturianu yera afayaízu pa toles granes y plantes. Crio guxanos de seda, alcontró mármoles primorosos, inventó máquines, xuntó capital y fomentó la industria per tolos cabos...”. Pedrayes dedica ampliu espaciu nel llibru a afondar na relación d’esti “novator” (llibrepensador ortodoxu, eruditu, partidariu de los avances científicos y de la sociedá estamental...) coles principales personalidaes del so tiempu: Feixoo, col Marqués de Santa Cruz de Marcenao y el Marqués de la Ensenada, col Padre Sarmiento y el Doctor Casal... Termina Pedrayes: “La so xera algamó la lluz, foi un rayu de Modernidá nel cielu ñuble y señaldosu d’Asturies”. Quiciabes esa morera que tuvo aniciu en Pedro Antonio de Peón y qu’entá pervive en patiu de Les Escuelones de Villaviciosa sirva como homenaxe a un personaxe singular que representó como naide n’Asturies l’espíritu inquietu y contradictoriu de la so época, siempre a puntu de cayer nel olvidu. Como si nel pasáu nun tuviera escrita la historia del nuesu futuru.