Miraron equí

10 feb 2012

CASA ROTA Y DÍES DE MUNCHO


     Los mios antiguos compañeros de Trabe, y amigos, acaben de regalame cola cuarta edición de la mio novela Díes de muncho. Tengo que da-yos les gracies. Llevaba igual un par d’años agotada n’asturianu y namás se podía comprar na traducción española que KRK yá reimprimió. Resulta curiosa, pa min, la vida d’esta novela, tan llarga. De xemes en cuando dalgún club de llectura de sitios mui diversos d’Asturies convídame a echar un ratáu colos llectores (masculinu xenéricu bastante inxustu, porque suelen ser muyeres y a veces, non siempre, namás un home). Tengo que volver entós sobre’l llibru, y cuando digo volver refiérome a facer una nueva llectura, porque yá nun m’alcuerdo bien nin de los personaxes nin de les peripecies, y la xente pregunta y comenta coses mui concretes.
     Hai yá munchos años qu’escribí esta obra. Una parte d’ella redactéla en marzu de 1997 y depués reposó hasta’l branu d’esi añu, nel que la rematé en Sahagún de Campos, como un asturianu más de les cuenques asoleyando. Cuando la escribía, tenía presente yá’l cuadru de Carlos Sierra que-y sirve d’ilustración de cubierta dende la primer edición. Pa esta cuarta Samuel proponíame cambiar, y fexo una maqueta mui guapa, de munchu llamamientu, pero yo quería más esa casa derrotada que m’acompañó desque me punxe a escribila. 
     Sierra ye ún de los pintores que más me presten. El so hiperrealismu nunca dexa indiferente (nel mio casu, a apreciar l’abstracción deprendí un poco más tarde), pero creo que lo que de verdá me fai conectar cola so pintura ye la temática de los llienzos, tan cercana al mio mundu referencial de la infancia (una cocina de lleña, castañales, una fogaza, una vara yerba...) y la mirada cola qu’encuadra too eso, tan moderna. En «Casa rota», una obra de 1981 que vi per primer vez expuesta nel Muséu de Belles Artes d’Asturies, la naturaleza va tomando la casa en ruines y nel cuadru puen respirase l’abandonu y el desamparu. Yo veo una metáfora d’Asturies, lo que nos espera. Siempre pensé, desque vi’l cuadru, qu’escribiría un poema sobre él. Salió novela.

«Casa rota» (fragmentu), 1981.
Carlos Sierra


4 comentarios:

  1. Hai dos años o asina, pidiéronme qu'escribiera una columna d'opinión nel periódicu de tirada mensual) «La cuenca del Nalón». Dende entós llevo escribiendo tolos meses. Esti que te pego equí, ye la columna qu'escribí habrá un añu más o menos. Ciertamente un llibru imprescindible. Saludos.
    ----------
    «Llibros de muncho»
    Antón García ye ún de los críticos lliterarios y autores de renome de la lliteratura n’asturianu anguaño. Autor nacíu en Tinéu nel añu 1960, tien escrito un bon garrapiellu de llibros onde destaquen obres de poesía, narrativa y estudios ensayísticos o obres critiques de lliteratura. Quiciás, ún de los llibros más importantes na nomada segunda xeneración de Surdimientu seya la so novela «Díes de muncho» (col permiso de Xuan Bello y la so «Hestoria Universal de Paniceiros»), obra qu’en llinies xenerales fala, ente otres coses, d’un mundu que ta en procesu de desaniciu y un home que tien qu’escoyer ente lo que yera y lo que ye. El marcu o ambientación na que se desendolca la trama d’esti llibru, incluso la temática, sedrá un elementu, en llinies xenerales, común dientro d’esa segunda xeneración d’autores. El personaxe principal vese ente dos agües: el mundu rural qu’hereda de sos padres, sos güelos, y que debala irremediablemente pa esvanecese baxo’l pasu firme de la modernidá. Los personaxes vense nesa disyuntiva d’escoyer ente un pasáu murniu, fechu alcordanza o un futuru que tarace los raigaños.
    La dixebra de los dos mundos (el rural venceyáu lo tradicional y l’urbanu venceyáu a lo moderno) esprésala maxistralmente Anton García nesa obra al traviés d’una metáfora que va más p’alló de lo estético, ¿cómo reconciliar dos moos d’entender la vida, si nún, la nuestra güela, barría la porquería de la casa p’hacia fuera y nosotros barremos p’hacia dientro? Los múltiples matices semánticos qu’enzarra esta metáfora exemplifican esa visión señardosa y pesimista que los/les escritores treslladaron a les sos obres, influenciaos/es evidentemente pola idiosincrasia político-social-cultural del país asturianu nel que vivíen.
    Si dalguién quier una bona novela pa lleer o regalar, encamiénto-y facese con «Dies de muncho», d’Antón García.
    Sicasí, el primer llibru que lleí d’Antón García foi un ensayu de calter histórico-políticu, tituláu «Del centru a la periferia» y escritu a comuña cola so muyer Consuelo Vega, hai polo menos unos venti años. Llibru que falaba de les señes identitaries asturianes y que me sirvió p’abrime los güeyos énte’l fechu diferencial asturianu. Nun sé si Antón y Consuelo refuguen aquel escritu mozu. Tampoco si Amelia Valcárcel y Lluis Xabel Álvarez se distancien anguaño del llibru tituláu (creo recordar) «Propuestes pa un Nacionalismu Asturianu» escritu por ellos dos tamién va una montonera años.
    El casu ye que, estos dos últimos llibros mentaos, de va yá pa venti años o más, tán nel escaezu, práuticamente perdíos y rara vegada apaecen na bibliografía qu’atopamos per ende d’estos autores. Albidro qu’estos llibros s’escribieron en díes de muncho.

    ResponderEliminar
  2. Gracies, Ricardo, por tan guapu y amable artículu, que nun conocía. Tocante a «Del centru a la periferia», puedo dicite que nin Consuelo nin yo yéramos tan mozos cuando lu escribimos. Vas permitime que te diga que nun refugo esi llibru, y que pienso más o menos lo mesmo qu'entós, venti años depués y tantes coses pel mediu.
    Cuando s'escribió esi llibru había en marcha un procesu asturianista mui interesante, que caminaba en dirección ascendente y que dio unos cuantos frutos: una opción política parlamentaria, diverses empreses sociales y culturales mui variaes, una escolarización de la llingua con un obxetivu que nun yera namás el mantenimientu d'un puestu de trabayu, llueu un mediu de comunicación escritu... Un presente pequeñu y un futuru que se suponía n'expansión.
    Nun voi explicar cómo tamos agora, nun fai falta. Creo que se puede resumir, siguiendo les tesis d'aquel llibru, diciendo que la sociedá asturiana apostó claramente pola «provincia». Dicíamos nel capítulu final que'l retu pa l'Asturies del cambiu de mileniu yera «ser a conectar con un sector de la sociedá qu'impulse la so recuperación cultural o, lo que ye lo mesmo, la nacional». El problema nun ye lo que yo piense venti años más tarde. El problema ye lo que piensa esa sociedá asturiana agora.

    PS El llibru d'Amelia nun taba escritu con Lluís Álvarez, sinón con Ramón Cavanilles.

    ResponderEliminar
  3. Munches gracies pol apunte del llibru d'Amelia. Tienes tola razón, menuda cabeza la mía.
    Y gracies a ti pol to comentariu sobre aquel llibru tuyu, agradézote les tos pallabres que m'ayuden a conocer un pelín más esti mundu (lliteratura, Asturies...) nel que me muevo. Espero que nun dexes d'escribir (poesía, novela, ensayos... lo que seya) porque, polo menos pa mi, ye de lo meyor qu'atopo. Pa muestra, el to blogue. Un saludu Antón.

    ResponderEliminar