NOTICIES DE PORTUGAL

TRES POEMES DE LUÍS FILIPE PARRADO

     Esta entrada debería ser un reflexión sobre la casualidá. Sobre la manera en que llegas al mesmu sitiu dende distintos puntos de partida ensin saber por qué camín tas diendo. Esi llugar llámase Luís Filipe Parrado, un poeta portugués que descubrí llexando per internet y que llamó la mio atención hasta’l puntu de que traduxe dellos poemes suyos al asturianu, esa manera que tengo de lleer con procuru aquello que m’interesa especialmente. La poesía de Parrado, reflexiva, doméstica, orixinal y sabia, resultaba cercana y d’enorme llamamientu pa min. Pensé que nun próximu viaxe a Portugal tenía que me facer col so llibru, Entre a carne e o osso (Lingua Morta, 2012).

Luís Filipe Parrado

     Pero otra vuelta la casualidá crucióse pel camín. Hai un par d’entraes, nesti mesmu blog, daba cuenta  d’una páxina portuguesa, Do trapézio, sem rede, onde se podía alcontrar muncha poesía del mundu traducida al portugués por LP, dellos asturianos ente otros autores. Desveláu’l misteriu d’eses iniciales, el responsable, la persona qu’emprestaba atención a la poesía n’asturianu (tamos tan poco avezaos a que nos escuchen fuera de casa) yera Luís Filipe Parrado. De les tres traducciones que publico darréu, les dos primeres son poemes que pertenecen al llibru yá mencionáu, Entre a carne e o osso; el terceru ta sacáu d’internet.

ABOMINACIÓN

Per un momentu parezte posible

un sentíu pa la vida. Despiertes un fíu,

baxes les escaleres, andes les cais pesllaes

al tráficu de la memoria, les máquines

en movimientu trabayen con escasu esplendor.

Y notes que cuerpu y piel coinciden,

que les vértebres de los caballos sostienen

l’aire, que nel vasu quedó una borra del vinu

que te traxeron amigos que yá nun tán contigo.

Pero nesa traza de lluz darréu vuelve l’abominación

de la costume, y tu sientes el xelu de los sueños,

el ferruñu de los llibros llenos de cuspia, l’ascu

y la sospecha fixaos con plombu a la repisa

de los tos güeyos negros que nun van entender

enxamás cómo, dacuando, pudisti escribir

la palabra vida depués de la palabra sentíu.

CON UÑES Y DIENTES

Tar vivu

ye abrir un caxón

na cocina,

garrar un cuchiellu de mangu negru,

pulgar una naranxa.

Vivir ye otra cosa:

dexes el caxón zarráu

y arránqueslo too

con uñes y dientes,

el sabor amargo del pulgu,

de tan duce,

nun lo escaeces.

NA ASSEICEIRA, LLEENDO SOBRE LA VIDA Y LA OBRA DE PAUL GAUGUIN

La lluz de finales d’agostu depicua sobre

la terraza d’esta casa en pueblu

onde lleo que

el pintor Paul Gauguin

safóse de les obligaciones familiares

abandonando muyer y fíos

pa poder viaxar pelos Mares del Sur

y «persiguir el so arte».

En lleendo estes palabres

alzo los güeyos de la páxina 57

y veo enfrente mío

el báramu de cuervos posáu

nos gordos cables de la lluz,

la llanera del cielu, la tierra de maíz

más estensa de la contorna

onde s’escuenden los mios fíos

ún del otru, y los dos de min.

Pa Gauguin, volviendo a la llectura,

la llamada de la creación,

l’amor profundu pola pintura

falaran más alto que la prosa

de la esistencia pequenu-burguesa

na segunda mitá del ochocientos,

motivu que lo condució al refugu

«de los deberes convencionales

pa cola familia»,

definitivamente dexada atrás.

Pero, ainda sorrayando frases clares,

nun se vuelve evidente pa min

si’l pintor fexo lo «que sintió

que tenía que facer p’algamar

el so más altu grau de excelencia personal»

y, d’esta miente, facer manda a los homes

«del frutu del so arte»

(como argumenten Shai Biderman

& Eliana Jacobowitz)

o si, más exasperadamente

de lo que pueda parecer,

la pintura foi la tabla de salvación,

l’últimu recursu pa escapar

de la llamuerga (otros van dicir del infiernu)

de la vida conxugal, en Copenhague,

con Mette Sophie Gad y cinco nenos.

Tocante a mi,

prestábame desfacer la dulda

y siguir cola llectura,

de magar, en pueblu,

el sol de finales d’agostu dílese

per detrás del teyáu de la casa

y la nueche va arramando un aire frescu

que fai prácticamente imposible

l’actu de lleer.

Yá cásique a ciegues

lléguenme, entá, los gritos de los fíos,

nayundes,

y la voz de la mio muyer diciendo

qu’hai que poner la mesa pa la cena.

Por eso,

porque nun tamos en Taití

nin nel sieglu XIX

nin yo soi’l famosu pintor primitivu

modernu Paul Gauguin,

marco la páxina, piesllo’l llibru

y llevanto

pa tresnar los platos y cubiertos.

El poema, perdonen, tien qu’acabar equí.

LA VOZ DE LA TIERRA

Queixas, conxuros ya poemas gráficos d’un tiempu que foi

Naciu ’i Riguilón

Edición bilingüe asturiana y castellana

Uviéu, Trabe, 2012

     Aprovecha Naciu ’i Riguilón (Mual, Cangas del Narcea, 1962) los títulos de los tres llibros diferentes que formen esta entrega pa componer, sumando, el del volume nel que los publica agora Trabe nuna edición mui curiada y oportuna. Na solapa avísennos de que tamos delantre de la poesía completa d’esti activista cultural, aficionáu a los estudios etnográficos y, a lo menos nuna etapa de la so vida, un dibuxante mui estimable, anque desconozo si sigue cultivando esta faceta artística. Suel dicir la crítica, mui gráficamente, que la poesía asturiana de los años ochenta punxo esta lliteratura n’hora pel meridianu de la poesía peninsular, pero cuando se diz suelen dexase de llau propuestes poétiques daquella en marcha, como esta de la que falamos equí, que se movía entós y agora a contracorriente.

     L’impulsu creativu de Naciu ’i Riguilón («Naciu de casa Riguilón» quier dicir el so alcuñu) naz de la idea de perda, cuando’l poeta se da cuenta de que’l mundu nel que vivió hasta la so xuventú, na alta montaña canguesa, ta condenáu a desaparecer. «Queixas ya conxuros», la primer parte, empieza siendo una llamada d’atención a los sos paisanos (“Cúmu despertavos/ la concencia”), énte’l fechu constatable de que toa esa cultura, arreyada a les palabres que conformen el llinguaxe del poeta, camina hacia la desaparición. Na so ayuda invoca a un personaxe míticu, el bardu Xalabam (que toma emprestáu de la poesía de Roberto González-Quevedo), pa que dea vida a esos pueblos qu’esmorecen, los que conformen el territoriu tamién míticu de Pesicia, la tierra onde se fala asturianu occidental.

     Los «Poemas gráficos» son un conxuntu de 55 dibuxos de llinia clara, esquemáticos, que representen homes y muyeres moviéndose de manera expresiva. Básta-y el trazu que marca’l contornu pa captar l’estáu d’ánimu de cada figura, nuna obra personal y llamativa. Dalgunos d’estos dibuxos aparecieron en 1987 ilustrando’l númberu 3 (especial nueva narrativa asturiana) de la revista Adréi. 

     La tercer parte del llibru, «D’un tiempu que foi», abandona con cierta resignación la llamada angustiosa de la primera pa facer una propuesta más intimista, celebrando l’amor y los recuerdos, anque ensin dexar de compartir l’escenariu de «Queixas ya conxuros». Hai dalgo na poesía de Naciu ’i Riguilón que recuerda la cenciellez creativa del primer Uxío Novoneyra, el poeta gallegu del Caurel: la busca de la pureza de les palabres, l’aprehensión de les coses con solo nomales, l’austeridá expresiva... Lo que los separa ye la importancia que da Riguilón al paisanaxe frente al paisaxe del gallegu: el sentimientu cósmicu y telúricu col que Novoneyra interpreta’l so mundu nun tien sentíu, na obra del asturianu, si se prescinde del ser humanu que da voz a les palabres de la tierra.

POESÍA ASTURIANA

     Restolando per internet atopo un blog bien interesante, Do trapézio, sem rede, dedicáu n’esclusiva a publicar poesía del mundu traducida al portugués. La mayor parte de les versiones, mui curiaes, fírmales LP, anque hai tamién dalguna traducción d’otra xente, llectores del propiu blog. La novedá (internet ta llenu de páxines asemeyaes) ye comprobar la presencia de dellos poetes asturianos, de los qu’escriben n’asturianu y de los que lo fain n’español: Berta Piñán, Xuan Bello, Sofía Castañón, Laura Casielles (anque firme Casiells) y Roxana Popelka, si nun se m’escapó dalguién. Paga la pena echar una güeyada.

SOBRE’L DOLOR Y LA SOLEDÁ

Llunariu

Al Berto

Traducción d’Henrique G. Facuriella

Uviéu, Ámbitu, 2011

Al Berto, provocativu

     Convién señalar que l’autor d’esti Llunariu que traduz Henrique G. Facuriella al asturianu, Al Berto (Coímbra 1948 – Lisboa 1997), ye primero que nada un poeta que se llamaba Alberto Raposo Pidwell Tavares. Nenu ricu, pintor, editor con vocación marxinal, viaxeru, hippy, poco a poco foi construyendo un personaxe lliterariu provocativu y tresgresor, que llevantó la bandera de la militancia homosexual nuna sociedá, la portuguesa de los años setenta y ochenta, entá non preparada p’asumir tanta novedá. Esti llibru, que tovía firma na so primer edición de 1988 col so nome y apellíos  completos, yera la primer incursión del futuru Al Berto nel tarrén de la prosa. Dividíu en siete capítulos, del “Atapecer” a la “Umbría” pasando peles distintes fases llunares, termina col “Cánticu”, una puerta que l’autor dexa abierta a la esperanza, atopándose a él mesmu, anque la soledá que percuerre tola obra continúe siendo la esencia de la historia.

     El filu conductor de Llunariu ye’l personaxe protagonista, Beno, al que siguimos nes sos peripecies nocturnes (la “movida” portuguesa, cambiando’l gustu pola copla de la movida española pola señaldá del fadu), permitiéndonos conocer a los demás actores d’esta traxedia: una pareya homosexual, un amante ensin nome, una compañera de bar, una madre y el fíu, un viaxeru... Toos ellos tienen vida propia, pero parecen a la vez distintes mázcares d’un mesmu suxetu, como si na suma d’esos variaos fragmentos tuviera la clave del llibru, igual que les semeyes que s’esparcen delles veces nel relatu pa fixar la imaxe de dalgún personaxe. 

     Esta obra d’Al Berto, de la qu’Henrique Facuriella adelantara yá un fragmentu nel númberu 4 de la revista Reciella Malory (2010), nun llogra l’altura de la so poesía, de marcáu carácter simbólicu y intelixente síntesis d’un particular surrealismu mecíu colo beatnick, anque sirve pa conocer la base creativa d’un autor empeñáu, hasta consiguilo, en dexar güelga na lliteratura portuguesa. A falta d’una amplia antoloxía de la so obra poética n’asturianu, Llunariu, traducíu por Facuriella con procuru, aciertu y el mesmu pulsu poéticu del orixinal, permítenos averanos a un escritor singular, d’altu conteníu eróticu (nun da más si homo o heterosexual), que reflexiona sobre’l dolor y la soledá. Pero nun hai qu’escaecer al poeta, al que yo prefiero más qu’al narrador, anque esti llibru tenga munchos partidarios y llectores dientro y fuera de Portugal. 

     Quien quiera averase a la poesía d’Al Berto pue facelo dende l’antoloxía que coordinó y prologó Xuan Bello, Uma olhada diversa | Una mirada diversa, onde se publiquen once poemes traducíos por Vanessa Gutiérrez. Esta foi una antoloxía encargada pol Principáu por mor de la participación d’Asturies na Expolíngua de Lisboa en 2009. Una iniciativa feliz, oportuna, económica y perdurable, que les instituciones deberíen promover más a menudu. Por exemplu, como yá naide s’alcuerda de qu’hubo alcuentros bilaterales ente Asturies y Escocia, poca xente sabe que la guapa traducción de l’Antoloxía de Robert Burns publicada pol Principáu en 1990, d’Alfonso Velázquez, foi tamién un encargu personal del presidente Pedro de Silva por mor d’una atopada oficial ente los dos países. De Silva impresionó a los sos anfitriones citando n’asturianu los versos de Burns y obsequiándolos con aquel llibrín que prologaba Rubén Valdés Miyares. Dica poco naide va alcordase de les Expolingües, pero les traducciones van perdurar. Igual que’l trabayu bien fechu d’Henrique Facuriella al permitinos lleer coles nueses palabres esta obra singular d’Al Berto.

DALGO MÁS QU’UNA LLECCIÓN DE CIENCIA

Ciencia y llingua (Averamientu al léxicu científicu del Diccionariu de la llingua asturiana)

Fermo Fernández Suárez, Arturo Morales Muñiz, Eufrasia Roselló Izquierdo, Mª del Carmen Toro Gonzálvez

Uviéu, Trabe, 2012

     Ye difícil saber a qué se refería Constantino Cabal cuando escribía, na llamada a los poetes cola que remata L’alborá de los malvises (1944), que “todos hemos pecado contra el bable”. Pero pensaba neses palabres cuando avanzaba na llectura del llibru Ciencia y llingua, al comprobar la pasión, minuciosidá y el rigor colos que los cuatro autores d’esta obra vaciaron el léxicu científicu del Diccionariu de la llingua asturiana (DALLA) que publicó l’Academia de la Llingua Asturiana en 2000, p’analizalu darréu y proponer les correcciones y meyores que-yos abultaron pertinentes.

     Trés d’ellos, Morales, Roselló y Toro, son especialistes nel campu de la bioloxía, el primeru caderalgu de Zooloxía de la Universidá Autónoma de Madrid; Fernández ye llicenciáu en Ciencies Químiques, y nun tará demás destacar que los cuatro trabayen fuera d’Asturies, en Madrid. El resultáu del llibru va muncho más allá d’una simple llista d’aciertos y desaciertos de los académicos (y otres persones) que redactaron el diccionariu: ye un instructivu repás del mundu de la ciencia dende la perspectiva de la llingua asturiana, aptu pa tolos públicos, al alcance de cualquier interesáu na divulgación científica. Empiecen los autores fixando los sos criterios al respetive de los nomes científicos, acordies colos códigos internacionales de nomenclatura. Pasín a pasu, per orde alfabéticu de grandes temes (de los artrópodos a los reptiles y anfibios, pasando pela física, les matemátiques, la medicina o la química), van dando cuenta del vocabulariu básicu de les ciencies, tamién ordenáu alfabéticamente, con un sistema de trabayu que se repite: ofrecen la definición del DALLA, analícenla y coméntenla, a vegaes con minuciosidá y detalles (por exemplu, “pan de culiebra”, páx. 352), publiquen fotografíes o dibuxos ilustrativos y, si lo creen aparente, proponen otra qu’al so entender defina meyor, con más precisión científica, el lema correspondiente. Ponen especial procuru nos nomes científicos, pero tamién en distinciones más sutiles, como la diferencia taxonómica ente páxaru y ave, o n’ofrecer un xenéricu (“picatueru”) cuando parez necesario. Amás d’ello, proponen la entrada d’unos doscientos cincuenta términos comunes de les sos especialidaes que’l DALLA nun recueye.

     Les sos propuestes parecen convincentes na midida en que tán razonaes y son razonables, pero lo que me maravía ye la seriedá cola que se tomaron el trabayu de perfeccionar esti diccionariu, verdaderu patrimoniu asturianu. Dicíalo Cabal: “todos hemos pecado contra el bable” dacuando, por exemplu tomando a la llixera’l trabayu d’otros, ensin paranos a analizalu con detención y ensin facer propuestes que meyoren el tesoru común del conocimientu de la llingua asturiana. Moviéndonos nun entornu nel que la descalificación xeneral y gratuita abunda, la propiedá, la esactitú, la verdá que busca esti llibru sobre ciencia y asturianu ye una auténtica y prestosa llección.