Miraron equí

25 may 2014

RICARDO CANDÁS, DENDE L’ENIGMA DEL SILENCIU

     La Conseyería de Cultura convocó per primer vez en 1995 el “Xuan María Acebal” cola idea de que pasara a ser el premiu de referencia pa la poesía asturiana, igual que yá lu yera’l “Xosefa de Xovellanos” pa la narrativa. Yera l’añu nel que se cumplía’l centenariu de la muerte d’Acebal, y Amelia Valcárcel, daquella Conseyera de Cultura, quixo que se-y dedicara al poeta que naciera na cai del Águila d’Uviéu la Selmana de les Lletres, y que se recoyera en llibru per primer vez la so poesía. Naquel tiempu yá llevaba seis convocatories el premiu “Teodoro Cuesta” del Ayuntamientu de Mieres, con menos dotación económica, pero con una traxectoria consolidada a la que contribuyía la presencia estable nel xuráu del poeta José Luis Argüelles, peles manes del cual pasó la meyor poesía asturiana del momentu.

     La primer edición del “Xuan María Acebal” ganóla un autor de llinia discontinua, llamentablemente, porque la producción lliteraria de Xilberto Llano siempre tien interés. Titulábase’l llibru Silabariu y publicóse en 1996. Pero los años siguientes, qu’habíen ser los de consolidación del premiu, los xuraos decidieron repartilu ente dos autores (1996, 1999 y 2000) o dexalu desiertu (1998, 2003, 2004, 2006), quitando la convocatoria de 1997 que ganó Martín López-Vega col llibru Esiliu, y les que siguieron al 2001, desque ganó Casería de José Luis Rendueles. Cuando un premiu queda desiertu pue pensase que los participantes d’esi añu nun tuvieron a l’altura que s’esperaba d’ellos, pero ye raro que convocatoria tres de convocatoria ocurra eso. Amás, ún tien la impresión de qu’un ex-aequo cásique siempre se da porque’l xuráu nun fexo los deberes como debía y optó pel camín más fácil, el de llavase les manes repartiendo la dotación económica y esperando que seya’l llector quien decida (siempre con excepciones, como en toa xeneralización).
     Resulta interesante observar cómo hasta agora la mayor parte de los ganadores son xente nacío nos años sesenta (ocho autores, ente ellos Marta Mori, la única muyer col premiu). Perriba d’esa década, que tan bona collecha tien dao pa la lliteratura asturiana, namás Xuan Xosé Sánchez Vicente apunta’l so nome ente los que se llevaron el gallardón, mientres que son cuatro los nacíos yá nos setenta: el yá citáu López-Vega, Xandru Fernández, José Luis Rendueles y José Ángel Gayol.
Ricardo Candás
     El ganador de la convocatoria del 2013, Ricardo Candás, nació en Xixón en 1977 y lleva una década d’actividá lliteraria pública. Los primeros pasos que dio tuvieron vinculaos a la tertulia xixonesa “Poegía”, de la que fuera fundador, llogrando alredor del 2004 dellos premios de narrativa. Foi en 2005 cuando ganó’l premiu de poesía “Fernán-Coronas” con un llibru novedosu, Quiciás seya payares, que nos ponía delantre d’un poeta esencial dispuestu a romper cola rica llinia figurativa de la poesía asturiana, pero ensin desdexar la claridá conceptual nin la bayura espresiva.
     En 2010 publica un llibru de cuentos, Les últimes pallabres, al que sigue en 2012 Los díes pensatibles, una nueva entrega poética que continuaba dientro de les coordenaes d’indagación del primeru, basaes na contemplación y na recepción, un poco a la manera de José Ángel Valente, pa quien la poesía ye “antes que nada o mucho antes de que pueda llegar a ser comunicada, incomunicación, cosa para andar en lo oculto”. En 2011 vincula Candás el so nome al de la poeta valdesana “Nené Losada Rico” al ganar el premiu que convoca l’Asociación de Muyeres Valdés Sieglu XXI con Naufraxos, un llibru que parez marcar un cambiu de dirección na obra del poeta xixonés: nun ruempe col esencialismu característicu de les entregues anteriores, caltién una estética visionaria y una escritura paradóxica, pero empresta un mayor valor a lo que la poesía tien de comunicación.

     Esi cambiu de dirección poética que queremos ver en Naufraxos continúa nel llibru que gana la XIX convocatoria del Premiu “Xuan María Acebal”, y que se publica nel 2014, consolidando yá una voz personal. Titúlase Superficie del silenciu y lleva al frente unos versos de Caballero Bonald que nos ponen na pista de lo que vamos alcontrar: “Soy aquel que no quiso / recurrir al recurso del silencio / cuando ya no quedaban palabras por aquí.” Nel so llibru Ricardo Candás continúa refaciendo les sos visiones con una imaxinería vica y variada, alministrando’l silenciu de lo indeterminao en versos curtios qu’obliguen a una llectura pausada. El poeta fai un esfuerzu notable por comunicar la so experiencia de lo impronunciable y trescendental, por romper l’hermetismu y consiguir qu’afloren les esmoliciones de poeta atentu a lo que pasa nel mundu, pero ensin ocupase especialmente de lo que deba dicir el textu, ensin sentir que la so poesía necesite narrar pa facese entender. La poesía de Ricardo Candás nun habita un sitiu concretu, nun hai nella referencies a espacios xeográficos determinaos, a persones. El silenciu del títulu d’esti premiu Xuan María Acebal, esa superficie na qu’escarba’l poeta, ye l’enigma dende’l que la so poesía plantexa, con economía de palabres, la zárzana complexidá del so mundu interior.


UN POEMA DE RICARDO CANDÁS

Nada tien más años

Nada tien más años
que la muerte. Na so corteya
dalguien pobló
            fría salvia
de lluz menguao.

Dexa muezques
na orografía de la vida: escaezos
(tela esfilachao y desprendío
                                    del tiempu).

Nun esperes respuesta. Nin la muerte
sabe qué hai más allá
del so nome.


(De Superficie del silenciu, Premiu Xuan María Acebal 2013)

22 may 2014

UN TIEMPU NUEVU


Lliteratura, 30
Revista lliteraria asturiana
Uviéu, Academia de la Llingua Asturiana, 2014.

     Coincidiendo col XXXV Día de les Lletres acaba d’editase’l númberu 30 de la revista Lliteratura, una publicación que cumple venticinco años. Trai dalgunes novedaes amás del propiu conteníu que paga la pena destacar, como’l compromisu de salir anualmente alredor de la celebración de les Lletres, nel mes de mayu; pero tamién la renovación d’una parte del conseyu de redacción. El prematuru y llamentable fallecimientu del académicu Miguel Ramos Corrada dexa un furacu importante ente los redactores, tratándose d’ún de los primeros miembros del conseyu, xunto con Paz Fonticiella, Vicente García Oliva y Ignaciu Llope, que siguen. Sicasí, la entrada de dos nomes nuevos, Marta Mori y Xosé Ramón Iglesias Cueva, vien acompañada de la salida d’otros dos, Lluisa Suárez Sáez y Xuan Bello.
     Al frente de la revista sigue Xosé Bolado dende aquel primer númberu d’abril de 1990. Bolado, poeta él mesmu d’obra tardía y notable, foi y sigue siendo un llector destacáu de la lliteratura asturiana, emprestando atención especial a la so poesía y a la periódica renovación del xéneru. A él debemos, per un llau, l’Antoloxía poética del Resurdimientu (1989), la primera que se fexo d’esti periodu (Del aráu a la pluma, de 1977, yera otra cosa: un destacable exerciciu de fin de carrera d’unos estudiantes de filoloxía inglesa); Bolado fixa naquella obra, como yá señaló la crítica, la nómina esencial de la poesía de los años setenta y ochenta. Pero, per otru llau, tamién supo exercer como ponte d’entendimientu cuando diversos sectores del asturianismu, y en particular de la lliteratura, tensaben les cuerdes de la polémica en distinta dirección.

Xosé Bolado
(Semeya d'Olaya Pazos)
     La revista Lliteratura respuende a esi espíritu integrador: pocos escritores habrá que nun publicaran nes sos páxines nestos años. Esti númberu 30 miez colaboraciones de mui diversos estilos y d’autores de mui distintes edaes. De la llarga nómina (les semeyes de José Javier González, Sánchez Vicente, Paquita Suárez, García Oliva, Ángeles Carbajal, Gutiérrez Morán, Elías Veiga, Mª José Fraga...) prestábame facer posa en dellos nomes. Nel apartáu de “Narrativa” destacaría la colaboración de Carmen Gómez Ojea, una novelista renomada na lliteratura española que mantién un compromisu creativu col asturianu mui d’agradecer. Na sección de “Poesía” ye Esther Prieto quien llama l’atención, publicando cinco poemes inéditos, seguramente los primeros qu’asoleya desque salió La mala suerte en 2000. Tamién hai que señalar la participación d’autores mozos como Henrique Facuriella o Inaciu Galán, amás de Víctor Suárez Piñero, que traduz un cuentu d’Arthur C. Clarke.

     Sicasí, quiciabes lo más interesante del númberu seya la reivindicación que se fai de Carlos Álvarez, con entrevista y la publicación del so “Monólogu del tontu”. Alba, que populariza los personaxes de Cellero o El Pola y ye autor del llibru Del chigre (2006), ye quien meyor funde la vieya tradición humorística asturiana coles nueves necesidaes escéniques d’esti tiempu, siendo un auténticu home de teatru, un profesional que nun refuga’l compromisu personal pa cola llingua. Pero esti númberu 30 de Lliteratura entá trai otra novedá: l’axuda económica del Ayuntamientu d’Uviéu. Bien taría que la capital del Principáu fixera dalgo tamién por ser la capital de la cultura d’espresión asturiana; Uviéu ye con diferencia’l conceyu que menos invierte n’asturianu d’ente los mayores d’Asturies.

15 may 2014

SELMANA DE LES LLETRES ASTURIANES 2014

CÓMIC, IMAXE Y PALABRA


Un cuento viejo

     El 31 de marzu de 1889 editábase en Xixón el primer númberu de “La comedia gijonesa, periódico semanal festivo ilustrado”, que s’anunciaba na portada como fechu por Tarfe (testu) y Pepe (dibuxos). Na páxina 5 publicaba cuatro viñetes seriaes qu’ilustren “Un cuento viejo”: “Una vez era un rey,/ tenía tres fíes,/ vistióles de... colorao (ó azul)/ y tiróles al teyao.” El testu, n’asturianu, ye un cuentu mínimu que se conocía en munches partes d’España (recuéyelu Rodríguez Marín nos sos “Cantos populares españoles” de 1882), d’esos que se relaten a los nenos pequeños pa embromalos. Les cuatro viñetes escenificaben el cuentu con trazos eficaces y calidables, cola soltura habitual de Pepe Prendes, qu’ensiguida diba dexar l’oficiu de dibuxante satíricu pa convertise en dalgo serio: xuez. Teniendo en cuenta esi matiz colorísticu qu’introduz el testu (el “colorao o azul” nun figura en nenguna variante oral del cuentu popular), ye posible que la historieta pudiera llevar dalguna intencionalidá política. Cásique ensin proponéselu, Tarfe y Pepe Prendes taben echando a andar la historia del cómic n’asturianu.
Dibuxu d'Alfredo Truan
     Depués de Pepe Prendes, la combinación de dibuxu y testu n’asturianu parez que quedó reducida al chiste gráficu. Cuando, nos años setenta y ochenta del sieglu XX, la profesora Carmen Díaz Castañón publicaba les sos sucesives histories de la lliteratura bable, dedicaba un apartáu al cómic ensin dase cuenta de qu’esti xéneru necesita un desarrollu narrativu, esi “arte secuencial” que dicía Eisner cola economía de palabres que lu caracterizaba. Asina, Díaz Castañón namás destaca dos autores de chistes gráficos de posguerra: Alfonso Iglesias, el popular dibuxante de Pinón y Telva, y Rovés, el creador del Gaviotu, el personaxe playu. Díaz Castañón nun fai nenguna referencia al inicial Pepe Prendes, y escaez la notable collecha de dibuxantes humorísticos d’a primeros del sieglu XX, onde figuren nomes tan distinguíos como Truán, Valle o Milín, resalvando tamién los galanes que daba, agora sí, el cómic n’asturianu de la mano de Conceyu Bable (Ramón Fermín y Solís Santos).
Pinín y el madreñogiro, por Alfonso
     Alfonso ye la referencia histórica. Qu’empreste’l so nome al más importante certame de cómic convocáu n’Asturies pol Principáu, pa obres n’asturianu, ye la meyor manera de vincular yá pa siempre a esti dibuxante pa cola llingua asturiana. Ye verdá que nos sos trabayos, como un elementu caracterizador de los personaxes, Alfonso usaba espresiones asturianes (“Si vou, vou en bou, si nun vou en bou, nun vou” diz un pixuetu dibuxáu por él), pero toi seguru qu’a más d’ún tien que choca-y saber que les aventures de Pinín tienen n’asturianu poco más que’l títulu y dalguna pingarata de sabor local: hasta tal puntu los personaxes d’Alfonso tán integraos nel imaxinariu colectivu de los asturianos que cadún los incorpora na so llingua de referencia, ensin que pareza importar realmente la de creación orixinal.
     Esti arte, que llegó a tener figures asturianes de renome internacional (los hermanos De la Fuente, Isaac del Rivero fíu, Xuasús...), nun fexo otra cosa que consolidase usando la llingua del mediu que tocaba: español, asturianu, pero tamién francés o inglés. A los nomes que yá citamos habría qu’añadir los d’Adolfo García, Robert, Buylla, Quintana, Sergio Bances, Lucía Bande, Silvia Granda, Javier Rodríguez, Parissi, Frank, Alberto Álvarez Peña, Neto, Antonio Acebal, Enrique Carballeira, Ígor Medio (un autor qu’amerita que se-y dedique una Selmana de les Lletres)... Una nómina de dibuxantes imposible d’abarcar y que nun para de crecer, a veces arreyada a la prensa diaria que los acueye nes sos páxines, otres en publicaciones específiques (toes yá desaparecíes: Espolique, Tapón, El Wéndigo, El Llapiceru, El Gomeru, Cáctus Cómics...), y agora buscando abellugu nesi sacu ensin fondu que ye internet.


     Al cabu de 125 años parez oportunu celebrar esti aniversariu dedicando la 35 Selmana de les Lletres al cómic. Foi una pena que nun s’aprovechara pa publicar nun tomu los trabayos gallardonaos col premiu que’l mesmu Principáu convocaba pa historietes n’asturianu hai un cuartu de sieglu baxo’l nome “Urriellu”. Les seis o siete convocatories que se celebraron ente los ochenta y primeros de los noventa, y que nunca quedaron recoyíes en llibru, tienen ganadores de prestixu: Javier Marinas, Gaspar Meana (l’autor de la impagable “Crónica de Leodegundo”), Germán García... Dientro de los actos d’esta Selmana, el Principáu tuvo la feliz idea d’encargar un volume, “Dibuxando un camín”, a los ganadores de les cuatro convocatories del so Premiu Alfonso Iglesias, representantes del relevu xeneracional nel xéneru: cincuenta años separen el clasicismu d’Isaac del Rivero (Colunga, 1931), historia viva de la cultura asturiana qu’empezó a publicar de la mano del autor de Pinín, d’Alfonso Zapico (Blimea, 1981), el más internacional de los nuesos dibuxantes actuales. Los otros dos autores son Javier Marinas (Grau, 1967), colorista y de trazu llétricu, y Ruma Barbero (Somió, 1971) que, cola so capacidá de síntesis narrativa y la mirada comprometida y didáctica a la que nos tien avezaos, plantexa un verdaderu manifiestu xeneracional. Ruma termina la so colaboración con una declaración de principios sobre la llingua que facemos propia: “Yá eché la metá de la mio vida nesto, nun m’importa echar la otra metá”.

6 may 2014

ALFONSO ZAPICO, EL VIAXE DE VUELTA

     Asturies percíbese nel imaxinariu de los propios asturianos como un llugar carente de puntos cardinales. Cuando falamos del norte tamos pensando nel Cantábricu y nes tierres anglosaxones coles que llindiamos, la mar mediante, y non nes nueses ciudaes y pueblos de xunto al agua. El sur, pa nós, ye lo que queda más p’allá del Payares. Nun conozo asturianos que falen del este y del oeste d’Asturies, preferimos los más clásicos oriente y occidente pa navegar pela cartografía d’esta tierra, un llaberintu de ríos y montes pel que nos movemos tan a gusto que nun necesitamos siquiera buscar la salida.
     Pero hai veces nes que la vida obliga. Cuando un asturianu emigra, los primeros meses vive col pensamientu vueltu pa la tierra, empapándose de les novedaes que trai la que lu acueye y faciendo comparances. Al cabu del tiempu, si la estancia n’otres tierres se caltién, Asturies empieza a desdibuxase ente la nublina de la desinformación (siempre choca observar l’ausencia de noticies asturianes fuera) y hai que facer un notable esfuerzu por siguir conectáu a esa realidá, por siguir al tanto.
Alfonso Zapico
     Alfonso Zapico reflesiona nel últimu “Premiu de Cómic Alfonso Iglesias”, qu’acaba de recibir y que se va publicar l’añu que vien, sobre esa condición de viaxeru pel mundu que quier volver a casa y qu’entrín y non vive mirando pa ella. Nes páxines dibuxaes que sirven de prólogu a Cuadernos d’Ítaca, mientres cuerre per Avilés y estira baxo la cúpula del Niemeyer, refierve: “Tol tiempu lloñe de casa, pensando nesti malditu trozu de tierra, nesti cielu y nesta lluvia, y agora, cuando regreso, siéntome un estranxeru”. Como ye dibuxante, pon remediu a esa angustia (dalguna clase de señaldá, seguramente) reflesionando sobre’l destín del ser humanu y dibuxando nesos cuadernos que llama d’Ítaca. Recueye nesta ocasión, pa esti premiu que lleva’l nome del autor de Pinín, Telva y Pinón, diez d’esos apuntes rápidos que tienen en común la mirada que’l propiu dibuxante echa sobre’l mundu y sobre él mesmu.
     Alfonso Zapico nació en 1981 en Blimea. Tien colaborao colos sos dibuxos en múltiples publicaciones, con un trazu eficaz, rápidu y bien reconocible del que tien dicho Javier Cuervo que nél “hay huellas del cómic franco-belga que leyó y lee, en ese estilo cómico o caricaturesco que, aunque favorece el relato de la cotidianidad vista con humor, nunca ha sido un obstáculo para transmitir la acción, la aventura o los sentimientos”. Zapico estrenóse en llibru publicando en Francia, nel 2006, La guerra del profesor Bertenev, al que siguen nuevos llibros mayores: Café Budapest (2008), Dublinés (2011), La ruta Joyce (2011) y El otro mar (2013). En 2008 una beca del Festival de la Historieta d’Angulema va permiti-y residir na “Casa de los Autores” d’esa ciudá francesa, dedicáu al trabayu de dibuxante, ocupáu en narrar aventures que pasen n’escenarios mui diversos: la Rusia de los zares, la vida y los paisaxes de James Joyce, un violinista xudíu ente Budapest y Xerusalén en 1947...
     Los Cuadernos d’Ítaca déxennos ver al historietista na so intimidá. Alcontramos nesti llibru histories abiertes, cachinos de la propia vida de Zapico o de les persones más cercanes (familia, amigos, xente del so oficiu, otros emigraos...) que-y llamen l’atención y que singulariza pa nós, buscando nesos casos particulares una llectura de valor universal. Somos espectadores, asina, de la perplexidá cola que’l so tíu Milio ve cómo desmonten, na Fábrica d’Armes d’Uviéu, la máquina que supervisó a lo llargo de munchos años, “una metáfora de lo que ta pasando”. Cuando Zapico nos cuenta la historia d’un pozu mineru que zarra, fixa l’atención na muyer que llimpia les oficines y a la que naide diz nada sobre’l so destín llaboral y personal (y que resulta ser la propia madre del autor). Pero tamién dibuxa sobre l’abordaxe que supón llograr qu’un editor de cómic s’interese por una historieta y quiera publicala, sobre lo que ye la comunicación o el silenciu como seña d’identidá nuna familia, sobre les dificultaes que tienen les muyeres (el techu de cristal) pa llograr que se valore’l so trabayu nuna empresa. ¿Qué ve un francés cuando s’atopa con una casa vieya arrodiada d’un güertu desdexáu? Diz Zapico qu’un hogar en cuanto termine de restaurar la casa y llimpie’l güertu. ¿Y un español? Una excavadora, apartamentos y negociu.

     L’autor anuncia un nuevu llibru sobre Asturies que tien ochobre de 1934 como protagonista. Titúlase La balada del Norte, y yá tuvimos la suerte de conocer dalgunos de los protagonistes y paisaxes cuando los adelantó peles redes sociales. Pero lo más probable ye qu’enantes d’esa entrega mayor llegue esta otra, Cuadernos d’Ítaca, regalándonos n’asturianu delles reflesiones personales sobre asuntos que-y esmolecen, que nos ocupen a toos. Al final d’esti cómic cuenta una historia que-y pasa en Varsovia, cuando termina dexando una botella de vodka nel ascensor del edificiu onde vivió unos díes; que naide diga que ye “una sombra que va del oeste al este d’Europa y torna a casa como si ná”. Zapico vuelve a la so tierra coles manes enllenes. Trai dibuxos y esperiencia. Sabe, como Kavafis, que la riqueza ye’l viaxe. El poeta d’Alexandría encamentaba nel poema “Ítaca” aprender y aprender de los que saben. Ye lo que facemos lleendo les histories d’Alfonso Zapico, les obsesiones qu’apunta nos sos cuadernos de bitácora: “Sólo ye cuestión de puntos cardinales, latitudes y lonxitudes”, diz. Pero tampoco nun ha ser fácil, siendo d’una tierra que namás tien oriente y occidente.

(Publicao por Antón García, La Nueva España, 5-12-2013)