Miraron equí

13 mar. 2014

UNIDÁ D’OBRA

Glosario de edificación en viñetas
Gabino Busto Hevia
Prólogo de Pepe Monteserín
Oviedo, Colegio de Aparejadores y Arquitectos Técnicos, 2013.

Cubierta del llibru
     Mientres duró l’aventura del Aula Abierta, na Llibrería Asturiana de Trabe, tuvi la suerte de tratar a menudu a Gabino Busto Hevia, al que yá conocía del so trabayu nel Muséu de Belles Artes d’Asturies. A lo llargo d’unos dos años, ente’l 2005 y el 2007, organizamos na trestienda d’aquella llibrería esposiciones de pintura, ente les que recuerdo la d’Ánxel Nava, que tresformó la sala nun espaciu máxicu, y la de Nel Amaro y les sos ocurrencies sorprendentes. Na mayor parte de les esposiciones exerció como comisariu Gabino Busto, y pude apreciar bien la so xenerosidá (como sabe la Pinacoteca Municipal de Llangréu), el so bon gustu y el procuru col que s’ocupaba de cada pasu, sabedor, como Kavafis, de que l’arte nun ye nada ensin los detalles. Los sos llectores tenemos oportunidá d’atopar en catálogos l’arte que tien pasando a palabres les pincelaes d’otros, pero pocos sabrán que Busto Hevia ye tamién un secretu escritor de cuentos n’asturianu.
            Agora acaba de publicar un Glosario de edificación en viñetas, un prestosu diccionariu de términos relacionaos cola construcción, onde ofrez una definición precisa (del tipu “Calle: Vía entre dos líneas de edificios o solares”) ilustrándola con una o varies viñetes sacaes de la historia mundial del cómic; nel casu de “calle” reproduzse un dibuxu d’Alfonso Zapico. Na introducción, el propiu autor nos cuenta, per un llau, el so curiáu por tomar en consideración los intereses y curiosidaes de los profesionales de la edificación, emprestando especial atención al usu residencial, y per otru l’interés que tenía n’incorporar trabayos de dalgunos de los meyores y más influyentes dibuxantes de la historia de la narración gráfica, como McCay, Foster, Caniff, Hergé, Raymond o Eisner. El resultáu, dexando a un llau lo que-y pueda parecer al profesional de la construcción, ye un verdaderu aciertu desde’l momentu nel que permite comprobar el curiáu col que los dibuxantes representen el mundu que los arrodia, dende vistes xenerales de ciudaes (Milán, París, Barcelona..., pero tamién fantástiques), a unidaes d’obra (componentes unitarios nos que se pue descomponer una obra) o términos propios del oficiu: “Arquitrabado”, “Cimbra”, “Cumbrera”, “Gablete”, “Imposta”, “Jabalcón”...
            Al simple aficionáu al cómic permíte-y refrescar la memoria repasando la historia de los tebeos, dende’l cásique fundacional Little Nemo a los dibuxos recientísimos de Juan Berrio, pasando pelos clásicos de tou tiempu y llugar: equí tán los mexicanos de la Editorial Novaro qu’ilustraron la nuesa infancia, Moebius, Ibáñez, Manara, Uderzo, Vázquez y tantos otros, anque’l manga namás tea representáu nel prólogu de Pepe Monteserín. Como nun podía ser d’otra manera, Asturies ocupa tamién un sitiu nel llibru. Aparez definíu “hórreo” y va ilustráu con dibuxos d’Isaac del Rivero (nel glosariu) y d’Alfonso (nel prólogu). Y anque echamos de menos, como cásique siempre, a los dibuxantes que s’agruparon alredor de Cactus Cómics (Ígor Medio, Andrea Parissi, Son, Ruma, Javi Rodríguez, Germán García...), la nómina de dibuxantes asturianos ye xenerosa: amás de los citaos Zapico, Del Rivero y Alfonso, tán representaos Juan Botas, Ángel de la Calle, Jaime Herrero, Salvador Miralles y Gaspar Meana.

No hay comentarios:

Publicar un comentario