La Real Academia Galega decidió dedicar el Día das Letras Galegas del 2011 a un escritor controvertíu, que siempre se movió a los sos deleres, lluchando contra los demonios interiores y exteriores que lu atormentaben. Lois Pereiro sufrió nes sos carnes los dos más graves síndromes del final del sieglu XX: l’envelenamientu por colza, nos ochenta, y el SIDA (yera toxicómanu), yá nos noventa, que terminaría cola so vida. Per munchu tiempu foi la presencia siempre ausente de la lliteratura gallega: dalgunos poemes publicaos nes revistes qu’entamaben los amigos, la participación en dalguna antoloxía por idéntiques razones.
Nos años noventa, cuando se siente firíu de muerte, la so obra miedra y afonda de manera considerable, reflexionando de manera descarnada sobre la muerte, y seguramente por ello sobre l’amor y la vida. Pero siguía siendo un autor secretu, contracultural, expresionista, hasta que l’Academia lu punxo nel escaparate de la cultura gallega y tolos güeyos se volvieron pa él: nestos últimos meses foi l’autor, ensin importar xéneru o nacionalidá, más vendíu en cualquiera de les llingües de Galicia. Un poeta.
 |
| Lois Pereiro (por Vari Caramés) |
No a la transmigración en otra especie.
No a la postvida, ni en cielo ni en infierno.
No a que me absorva cualquier divinidad.
(…)
Mi envite es al no ser. A lo seguro.
Rechaza otro existir, tras consumida
mi ración de este guiso indigerible.
Otra vez no. Una vez ya es demasiado.
J. M. Fonollosa
TRANSMIGRACIÓN
Esta enerxía yá nun va tener fin,
non foi creada nin va ser destruida.
Va dir ocupando diferentes vides,
tresformándose n’emociones ayenes
tatuaes n’otros cuerpos paralelos,
en simultanies procesiones
ensin pausa.
Nun cálidu universu apasionáu
voi dosificándome con usura,
hasta que llegue la hora de volver,
cansu y feliz,
al puntu de partida. The time is out of joint. O cursed spite
That I ever was born to set it right!
W. Shakespeare, Hamlet
EL CORREDOR DE FONDU PIERDE L’ALIENDU
Afuxendo d’una vida empicada de renuncies
de la so liturxa obesa y oleosa,
mediocre nos sos comunales fracasos,
llágrimes de xelu, indignación contenida
nun-y llegó’l tiempu d’exercer
la so rebelión,
nin de llevar a cabo
la so venganza definitiva
contra un mundu inxustu, homicida, y cruel,
pola inutilidá de la so propia vida
solitariu, enfermu y fatigáu,
la muerte anticipóse y llegó antes.
No hay comentarios:
Publicar un comentario