Miraron equí

1 dic. 2011

NUEVOS CUENTOS POPULARES

El cordobeyu y otros cuentos (nueve cuentos alleranos)
Joaquín Fernández García
Uviéu, Trabe, 2011

     Dende’l primer llibru, Coses d’osos (1993), la obra narrativa de Joaquín Fernández afonda no qu’él llama “recreación etnográfica”. Les sos histories suelen ocurrir nel Altu Ayer, anque dacuando, como en Siete vides (2001), la necesidá emburrie al protagonista allende los mares, pa cerrar el círculu de la vida otra vuelta en pueblu. Fernández ye un escritor costumista, quier describir los vezos y maneres d’una sociedá determinada. Si agora se fala de neocostumismu pa etiquetar la obra de los qu’escriben sobre tribus urbanes, igual había que falar de “paleocostumismu” pa definir la obra de Fernández. Porque’l mundu pel que se mueven los sos protagonistes queda ancláu nun pasáu munches veces atemporal, nel que tovía nun entraron los avances técnicos. L’autor demórase apurriendo información sobre cómo viven, visten, cuemen y trabayen, en qué creen, cómo enfermen y cómo fain por sanar. Joaquín Fernández (Uviéu, 1943) ye médicu, y esa formación nótase nes sos narraciones, siempre atentes a la salú y a los remedios populares.
     Les nueve histories que recueye nesti llibru, El cordobeyu y otros cuentos, participen d’esa recreación etnográfica. El poder curativu de l’arcea, el páxaru misteriosu; el miedu y cómo enfrentalu, la importancia del engañu, un relatu de probes y maquis, la fidelidá animal del perru Very, cómo muerre una bruxa..., son dalgunos de los temes que trata, ensin faltar la conocida historia del cordobeyu que da títulu al llibru, o un relatu de cómo se les arreglaba na posguerra una muyer vilba de republicanu y munchos fíos pa salir alantre. Cadún de los cuentos va precedíu por unes llinies explicatives qu’enmarquen lo que se va contar, y tovía al final del volume hai unes notes que dan cuenta de los informantes o de la bibliografía de cada historia.
     Escritu na variedá ayerana del asturianu, ye un verdaderu placer entrar na llingua vivida del autor, de la que siempre se sal sabiendo más. Ye verdá qu’a veces nun se trescriben acordies los sos manuscritos (aparez vicía” onde debería dicir “viúa”, por exemplu), pero naide como Joaquín Fernández pa topar el términu precisu que describa dalgo, como cuando define al padre d’ún de los protagonistes en tres palabres: “recoteyéu, prestamusu y enterraor”, o cuando nos da la llista, per orde alfábeticu, de les clases de perros que conoz: albaraniegu, alforxeru, cobraor, falderu, gozque, llebreru, ventor... En definitiva, les de Joaquín Fernández son narraciones morales, que se caractericen por una común mirada bondadosa, confianza nel ser humanu, atención a los detalles etnográficos, riqueza léxica y cenciellez narrativa resuelta con oficiu.
(Publicao en Cultura, La Nueva España, el 24-11-2011)

No hay comentarios:

Publicar un comentario